Hewlêr (Rûdaw) - Çavkaniyekî ji taxa Kurdan a li Helebê, Eşrefiyeyê ji Rûdawê re got, "Artêşa Ereban a Sûriyeyê temamiya taxê kontrol kiriye û li malan digere."
Li gorî gotina wî çavkaniyî, çekdarên Artêşa Ereban a Sûriyeyê mal bi mal li endamên Hêzên Ewlekariya Hundirîn (Asayîş) digerin.
Rizgar Henanê ji taxa Eşrefiyeyê ya Helebê bi telefonê beşdarî bultena Rûdawê bû û behsa rewşa taxê kir û got:
"Artêşa Ereban a Sûriyeyê temamiya taxê kontrol kiriye û li malan digere.
Ji êvarê ve şer nesekiniye, Eşrefiye û Şêx Meqsûd tên bombebarankirin lê ciwanên Asayîşê ew (Artêşa Ereban a Sûriyeyê) bi paş de vegerandin."
Rizgar Henan li ser şer û ziyanan wiha got:
"Min heta niha şerekî wiha nedîtiye. Li Şêx Meqsûdê 65 kes şehîd ketine, bi dehan mal û otomobîlan zerer dîtiye.
Ji sedî 70yê qurbaniyan xelkê sivîl in."
Rizgar Henan da zanîn ku nexweşxaneya taxê hatiye bombebarankirin û got:
"Elektrîk nîne, xwarina pêwîst nîne û bajar bûye bajarê xeyalet, çûn û hatin qedexe ye û rewş gelekî xerab e."
Rizgar Henan her wiha anî ziman:
"Bombebaran gelekî bê ser û ber in û Îstixbarata Leşkerî ya Sûriyeyê dibe ku 500 top avêtibin taxê."
Artêşa Ereban a Sûriyeyê ev 3 roj in bi tank û wesayîtên zirxî taxên Kurdan ên li Helebê dorpêç kirine û şerekî dijwar di navbera wan û Asayîşê de diqewime.
#VÎDEO - Rizgar Henanê ji taxa Eşrefiyeyê ya Helebê:
— RudawKurdi (@RudawKurdi) January 8, 2026
💢 ❝Artêşa Ereban a Sûriyeyê Eşrefiye kontrol kiriye❞
💢 ❝Asayîş bi şer ji Eşrefiyeyê derket❞
💢 ❝Ji Asayîşê gelek kes dîl hatin girtin❞ pic.twitter.com/Hu57ZIBs3U