AK Partî û CHP li pey hev in, ferq tenê 1,3 puan e
Hewlêr (Rûdaw) - Li gorî rapirsiya Şirketa Lêkolînan a ORCyê, eger vê yekşemê hilbijartin bên kirin AK Partî bi ferqeke kêm li pêşiya CHPyê ye.
DEM Partî jî di rêza sêyem de ye.
Şirketa Lêkolînan a ORCyê encamên rapirsiya xwe ya dawî ya li ser hilbijartinan li ser hesabê xwe yê medyaya civakî belav kirin ku di navbera 28ê Çiriya Paşîn û 1ê Kanûna Pêşîn a 2025an de kiriye.
Rapirsî li 26 parêzgehên Tirkiye û Bakurê Kurdistanê bi beşdariya 2 hezar û 560 kesan hatiye kirin.
Ferqa di navbera AK Partî û CHPyê de kêm e
Di rapirsiyê de pirsa “Eger vê yekşemê hilbijartin bê kirin hûn dê dengê xwe bidin kîjan partiyê?” ji xelkê hat kirin.
Li gorî encaman, ji sedî 33,2yê beşdaran gotiye “AK Partî” û ji sedî 31,9ê beşdaran jî “CHP” hilbijartiye.
Ferqa di navbera her du partiyan de tenê 1,3 puan e.
DEM Partî partiya sêyem e
Her wiha DEM Partî jî bi rêjeya ji sedî 7,9an a dengan bû partiya sêyem.
Piştî DEM Partiyê, MHPyê bi rêjeya ji sedî 6,8an di rêza çarem de ye û ÎYÎ Partiyê bi rêjeya ji sedî 6,5an di rêza pêncem de cih girt.
Encamên rapirsiya ORCyê wiha ne:
- AK Partî: Ji sedî 33,2
- CHP: Ji sedî 31,9
- DEM Partî: Ji sedî 7,9
- MHP: Ji sedî 6,8
- ÎYÎ Partî: Ji sedî 6,5
- Partiya Zaferê: Ji sedî 3,4
- Yenîden Refah: Ji sedî 2,8