Mêhvan mazûvan dan ber kêran: Bav û kur mirin, dê birîndar e

Hewlêr (Rûdaw) - Li parêzgeha Muglayê ya Tirkiyeyê mêhvanekî xwediyên malê dan ber kêran, bav û kur mirin, dê birîndar e.

Bûyerê şeva borî li navçeya Ortacayê ya Muglayê rû da.

Li gorî agahiyan, K.U. bi mêhvandarî çû malekê lê di navbera wî û malxweyê malê Menderes A., kebaniya malê Nesrîn A. û kurê wan Kivanç A. de nîqaş derket.

Piştî ku nîqaş gur bû K.U. bi kêrê êrişî mazûvanan kir.

Piştî ku agahî çû ji wan re polîs û tîmên tenduristiyê çûn cihê bûyerê.

Tîmên tenduristiyê destnîşan kir ku malxweyê malê û kurê wî li cihê bûyerê mirine û termên wan veguhastin Saziya Bijîşkiya Dadî ya Muglayê.

Tîman Nesrîna birîndar jî bi ambulansê bir nexweşxaneyê.

K.U. jî piştî bûyerê hat desteserkirin.