Brîtanyayê spasiya rola Nêçîrvan Barzanî ya ji bo aştiyê kir

RÛDAW

Hewlêr (Rûdaw) - Serokê Herêma Kurdistanê û Wezîrê Dewletê yê Brîtanyayê yê Kar û Barên Rojhilata Navîn li Foruma 5emîn a Dîplomasiyê ya Antalyayê civiyan.

Wan li ser bipêşxistina pêwendiyên Îraq, Herêma Kurdistanê û Brîtanyayê dan û standin kir.

Serokatiya Herêma Kurdistanê li ser naveroka civîna Nêçîrvan Barzanî û Wezîrê Dewletê yê Brîtanyayê yê Kar û Barên Rojhilata Navîn Hamish Falconer daxuyaniyek belav kir.

Li gorî daxuyaniyê, di civînê de bipêşxistina pêwendiyên Herêma Kurdistanê û Îraqê yên li gel Brîtanyayê hatin nirxandin.

Her wiha pêşhatên dawî yên rewşa siyasî û pêvajoya pêkanîna hikûmetê ya li Îraq û Herêma Kurdistanê hatin nîqaşkirin.

Di daxuyaniyê de hat diyarkirin ku her du aliyan ji bo parastina destkeftiyan û derbaskirina astengiyan "tekezî li ser girîngiya hevbeşî û yekrêziya aliyên Kurdistanî kir."

Rewşa Sûriyeyê û rola Nêçîrvan Barzanî

Serokatiya Herêma Kurdistanê da zanîn ku mijareke din a civînê rewşa aloz a herêmê, encamên şer û rewşa Sûriyeyê bûye.

Wezîrê Dewletê yê Brîtanyayê " ji bo hewlên wî yên ji bo çespandina aştî û aramiyê ya li Îraq û Sûriyeyê spasiya rola erênî ya Serok Nêçîrvan Barzanî kir."

Her du alî li ser wê yekê hevnêrîn bûn ku pirsgirêk tenê bi rêya dîplomasî û aştiyê dikarin werin çareserkirin.

Her wiha wan destnîşan kir ku divê herêm ji metirsiya şer û pevçûnên zêdetir were parastin.