Li Antalyayê şewat, jineke Sûriyeyî ya ducanî û 5 zarokên wê mirin

Hewlêr (Rûdaw) - Li navçeya Kepezê ya parêzgeha Antalyayê ya Tirkiyeyê agir bi konteynerekê ket.

Di encama şewatê de jineke Sûriyeyî ya ducanî û 5 zarokên wê canê xwe ji dest da.

Di bûyerê de 4 kes jî birîndar bûn û ew rakirin nexweşxaneyê.

Şewat nîvê şevê derket

Li Taxa Gazîlerê ya navçeya Kepezê derdora saet 01:30î agir bi wê konteynerê ket ku malbateke Sûriyeyî tê de dima.

Heta niha sedema derketina agir nehatiye diyarkirin.

Li ser agahdarkirina derdorê, tîmên agirvemirandinê, cendirme û tîmên tenduristiyê çûn cihê bûyerê.

Tîman bi lez midaxeleyî agir kir û şewat temirand.

Nasnameyên wan diyar bûn

Tîman piştî vemirandina agir li nav konteynerê lêgerîn kir û termên 6 kesan dîtin.

Hat diyarkirin ku jina Sûriyeyî ya ducanî Leyle Elelî (27) û zarokên wê yên bi navên Muna Ehmed (9), Fatma Ehmed (8), Heyat Ehmed (7), Îman Ehmed (5) û Mehmûd Ehmed (4) mirine.

4 kes ji ber dûxanê birîndar bûn

Di vê şewatê de 4 kes jî ji ber dûxanê bi jehrê ketin û birîndar bûn.

Hat destnîşankirin ku birîndarên Sûriyeyî Şewah Ehmed (29), Mehmûd Ahmed (53) û Ehmed Ehmed (2) in.

Her wiha xwediyê kargehê yê Tirkiyeyî Rahman Gençê 51 salî jî di nav birîndaran de ye.

Tîmên tenduristiyê birîndar veguhastin nexweşxaneyê û dermankirina wan didome.

Hat ragihandin ku derbarê karesatê dest bi lêpirsînê hatiye kirin.

3 kes hatin desteserkirin

Parêzgarê Antalyayê Hulusî Şahîn ragihand ku ji ber vê bûyerê 3 kes hatine desteserkirin.

Hulusî Şahîn diyar kir ku ew li ser sedema şewatê jî lêkolînan dikin û got:

 “Heta niha sedem ne diyar e. Li derve sobeyek heye. Agir hatiye pêxistin, dibe ku agir venemirandibin û raketibin lê sedem hîn ne zelal e.”