Fîçer - Hesen Murad êşên Helebceyê dinivîse

Li Helebceyê, bajarekî ku dîroka êş û hêviyê tê de têkel bûye, hunermendekî jêhatî heye. Hesen Murad Mihemed, mamosteyê Peymangeha Hunerên Ciwan a Helebceyê, ne tenê wênekêşekî jêhatî ye lê çîrokbêjê dîroka gelê xwe ye.

Ji destpêka karê xwe ve, jêhatîbûna Hesen a ji bo hûrkariyan di wênesaziyê de derket holê, lê derfetên wî yên derketina derve sînordar bûn. Heta ku li koleja hunerê bi hunera hîper-realîzmê re bû nas, ew şêwaza nû ya ku di salên 2000î de hat Kurdistanê. Hîper-realîzm ji bo Hesen ne tenê teknîkek bû lê wêne û amûrek ji bo gihandina peyamên herî kûr bû.

Hesen biryar da ku bi hunera xwe xizmeta Helebceyê bike, bi belgekirina çîrokên wan kesên ku piştî kîmyabaranê bi gelek pirsgirêkan re rûbirû mane. Wî berê xwe neda şehîdan lê berê xwe da hêviyê, da wê baweriyê ku Helebce dikare li ser lingên xwe bisekine.

Di karên xwe de, Hesen wan nihêniyan eşkere dike ku çavê asayî nabîne. Her hûrkariyek di çerm de, her çavek di portreyên wî de, dibe peyameke berxwedan û xwe-dîtinê. Hunera wî ne tenê ciwanî ye lê bîranîneke zindî ye ku dîroka gelê wî diparêze.