Fîçer - Koma Hunerî ya Bajarê Zeytûnê

Li Başîqayê, 12 xort û keçên êzîdî ji sala 2022yan ve komeke hunerî bi navê Koma Hunerî ya Bajarê Zeytûnê ava kirine. Ji bilî muzîka resen a kurdên êzîdî, ev kom dîlana folklorî ya êzîdiyan jî pêşkêş dike.

Ew her hefte du sê rojan diçin ser mezarê Şêx Bekir. Pêşî duayên xêrê dikin û paşê dest bi rahênanên xwe dikin. Xasma rahênanê li ser semayên dîlan, gulşeynê û suletkê ku sê dîlanên pîroz ên êzîdiyan e, dikin.

Endama Koma Bajarê Zeytûnê Karêz Reid dibêje: "Ez pêşî beşdarî bernameyeke torên civakî bûm. Ez keça yekem bûm ku tevlî vê komê bûm. Paşê keçên din jî hatin. Pêşî gelek rexne li me kirin, çimkî keç pir kêm vî karî dikin. Lê me guh nedayê û dê û bavê min pir alîkariya min kirin. Dema ku ew hemû keç hatin, me bawer kir ku ev ne karekî xirab e."

Ev kom dixwaze çand û dîroka kurdên êzîdî li Deşta Neynewayê bi taybetî û li Iraq û Herêma Kurdistanê bi giştî biparêze.

Tu aliyek hevkariya komê nake. Ew bi xwe cil û kinc û pêdiviyên koma xwe dikirin. Lê dîsa jî li ser parastina çanda kurdên êzîdî germ û gurr in.

Endamê Koma Bajarê Zeytûnê Elyas Elî dibêje: "Alîkariya me baş nayê kirin, bo nimûne, me ev cilên xwe bi pereyên xwe kirîne. Her endamek cilan ji xwe re dikire. Carinan ez pêdiviyan ji dikana xwe ji koma me re tînim."

Ew di piraniya hilkeft û festîvalên xwe yên neteweyî de beşdar dibin û dixwazin çanda koma xwe bi cîhanê bidin nasîn. Ji ber vê yekê bi dilekî xweş di koma xwe de berdewam dikin.