Hewlêr (Rûdaw) – Ebba Adolfsson û Julia Hagstrom yên ji Swêdî ji bo lêkolîna li ser çûkan berê we dane Îdir a Bakurê Kurdistanê.
Ebba Adolfsson welatiya Swêdê ya 21 salî ji bo lêkolîna li ser çûkan berê we daye kêlaka Çemê Arasê ya li parêzgeha Îdir a Bakurê Kurdistanê. Ebba çûkên ku ketine torê yek bi yek digire wan dixe tûrikan. Armanc ji vî karî çavdêrî û lêkolîna derbarê çûkên cor bi cor in ku bo koça xwe ya ji parzemînên Asya, Ewropa û Afrikayê Îdirê bikartînin.
Ebba Adolfsson behsa hatina xwe kir û got, “Ez bi pêşniyara hevala xwe hatim vê derê. Derbarê Arasê de pêşbiniyeke min a baş hebû û dîtin û çavdêrîkina çûkên corbicor û rengîn gelek xweş e. Ez destpêka Nîsanê hatim vê derê û ez dê dawiya Hezîranê vegerim welatê xwe lê ji ber ku min gelek jê hez kir ez dê di Îlonê de careke din vegerim.”
Li wêstgeha xefikkirinê û bihişta çûkan a Arasê ye û navenda lêkolîna çûkan çendîn lêkoler û xwezahezên xwebexş bi hevbeşî di vê navendê de lêkolînan li ser çûkan dikin. Li vê derê cor, qam û çendîn taybetmendiyên çûkên ku hatine girtin tên destnîşankirin û piştre tên berdan.
Julia Hagstrom jî hevala Ebbayê ye û ew jî ji Swêdê bo lêkolînên li ser çûkan hatiye vê navendê.
Lêkolîner Julia Hagstrom anî ziman, “Min ji hinek hevalên xwe bihîst li Swêdê , li ser cûdahiya ku li vir heye û xelkê vir baş in, payîza borî min û hevala xwe ku em niha bi hev re ne me gotûbêj kir ku em bikaribin vê demsalê bên vir."
Wêstgeh di sala 2006an de hatiye damezrandin. Di sala 2021an 3 hezar û 500 çûkên ji 68 corên cuda li vê navendê hatine xefikkirin. Ji sala ku hatiye damezrandin û heta niha jî zêdeyî 200 cor çûk li vê navendê hatine dîtin û bi giştî lêkolîn li ser zêdeyî 105 hezar çûkan de hatine kirin.
