Maça Amedspor û Umraniyesporê: Gola zêrîn xuleka 90+3yan hat

Hewlêr (Rûdaw) - Tîma Ameda Bakurê Kurdistanê Amedspor, di çarçoveya Lîga 1emîn a TFFyê de bû mêvana Umraniyesporê û bi encama 4-3 bi ser ket.

Amedsporê di maça ku gelek gol tê de hatin avêtin de, di xulekên dirêjkirî de bi ser ket û 3 puanên girîng xistin berîka xwe.

Poko û Moreno dest pê kir

Amedsporê bi lez dest bi maçê kir û di xuleka 37an de bi gola Andre Poko 1-0 ket pêş.

Çar xulek piştî vê golê, bi êrişa Moreno lîstikvanê dijber Burak Oksuz golek avêt qeleya xwe û Amedsporê ferq derxist duyan.

Lîstikvanê Umraniyesporê Batuhan Çelikê di xulekên dirêjkirî yên nîvê yekem de ferq daxist yekê.

Di nîvê duyem de heman lîstikvanî careke din gol avêt û skor bû 2-2.

Gyan û Diagne derketin holê

Piştî wekheviyê Amedsporê zext zêde kir û stêrka ciwan Felix Afena-Gyan skor kir 3-2.

Lê belê Umraniyesporê bi gola biguman a Benny skor dîsa kir 3-3.

Tevî îtîrazên faulê jî hakîm biryara golê da.

Di xuleka 90+3yan de lîstikvanê Amedsporê Mbaye Diagne derket holê û bi gola xwe Amedspor bi encama 4-3 bi ser xist.

Bi vê encamê re Amedspor bi zêdehiya maçan derket rêza duyemîn.