VÎDEO - Agît Kabayel bû şampiyon: ‘Bijî Rojava, her bijî Kurdistan’

RÛDAW

Hewlêr (Rûdaw) - Boksorê Kurd Agît Kabayel di Şampiyoniya Boksa Giran a WBCyê de rikeberê xwe yê Polonyayî Damian Knyba bi nakawta teknîkî têk bir.

Kabayel piştî maçê peyameke girîng li ser Rojavayê Kurdistanê da û got:

"Em tiştên ku niha li Rojavayê diqewimin qet qebûl nakin."

Agît Kabayel şeva borî li bajarê Oberhausenê yê Almanyayê li Rudolf Weber-Arenayê derket ser rîngê.

Kabayel ji bo parastina kemera xwe ya şampiyoniya cîhanê ya giran a demkî ya WBCyê li hemberî Damian Knyba lec kir.

Li pêşberî nêzîkî 13 hezar temaşevanan, Kabayel di raunda sêyem de rikeberê xwe bi nakawta teknîkî têk bir û nasnavê xwe parast.

Bi vê encamê boksorê Kurd di kariyera xwe ya profesyonel de serkeftina xwe ya 27an bi dest xist û ev bû nakawta wî ya 19an.

"Bijî Kurdistan"

Agît Kabayel piştî serkeftinê li ser rîngê axivî û bi coş got:

"Gelekî spas. Ez spasiya hemû piştgiran dikim.

Ez dixwazim tiştekî bibêjim: Bijî Kurdistan! Silav li hemû mirovên ji welatê min."

Kabayel bal kişand ser rewşa taxên Kurdan ên li Helebê û wiha axivî:

"Em tiştên ku niha li Rojavayê diqewimin qet qebûl nakin.

Wekî ku min got, Bijî Kurdistan! Ez ji bo we û hemû hezkiriyên xwe li vir im.

Ji bo me hemûyan şeveke xweş e."

Kabayel her wiha meydan xwend xwediyê kemera şampiyoniya cîhanê Oleksandr Usyk û anî ziman:

"Maça şampiyoniya cîhanê bidin min, ez amade me.

Ferq nake ez dê li kû û bi kê re lecê bikim, ez dixwazim ji bo kemerê şer bikim."

Agît Kabayel kî ye?

Agît Kabayel sala 1992yan li bajarê Leverkusenê yê Almanyayê ji dayîk bûye.

Ew bi eslê xwe ji navçeya Bazarcixê ya Mereşa Bakurê Kurdistanê ye û li Bochumê dijî.

Kabayel di kariyera xwe de gelek şampiyonî bi dest xistine ku di nav wan de şampiyoniya Ewropayê ya di navbera salên 2017 û 2019an de jî heye.

Boksorê Kurd di kovara The Ringê de ku wekî otorîteya boksê tê qebûlkirin, di nav 10 boksorên herî baş ên cîhanê de cih digire.