Serokê Amedsporê: Ji me metirsin

RÛDAW

Hewlêr (Rûdaw) - Serokê Amedsporê Nahît  Eren, di şahiya şampiyoniyê ya li Parka Newrozê de ragihand ku Amedspor dê bedewiyekê bibe Lîga Super û got, "Ji me metirsin. Rengê Amedsporê, ziman û çanda wê aştî û dostanî ye."

Kelecana Amedsporê ya ku îsal derket Lîga Super, li bajarê Amedê bi şahiyeke bi heybet hat pîrozkirin.

Bi hezaran alîgir li Parka Newrozê kom bûn da ku şampiyoniya tîma xwe pîroz bikin.

Serokê Kluba Amedsporê Nahît  Eren li ser dikê axaftinek kir û qala serboriya dijwar a tîmê ya heta vê serkeftinê kir.

“Em bi hev re bi ser ketin”

Nahît  Eren di destpêka axaftina xwe de Roja Dayîkan pîroz kir û her wiha pîrozbahî li tîma Mardinsporê kir ku derketiye Lîga 1emîn û hêvî xwest ku ew jî di nêzîk de werin Lîga Super û xwe li axaftinê berda:

“Me karên mezin kirin, em bi hev re bi ser ketin. Em rastî êriş, cudakarî û astengiyan bûn hatin lê me ti carî ji nasnameya Amedsporê tewîz neda.

Îro me ev kupa anî vî bajarî. Ez spasiya hemû lîstikvan, tîma teknîk û kedkarên klubê dikim ku bi biryardarî li ber xwe da.”

"Amedspor dengê wijdanê vî miletî ye"

Eren bersiv da wan derdorên ku ji Amedsporê ditirsin û got:

“Amedspor bû şampiyon. Kesên pîroz kirin û yên nekirin jî hene; em spasiya her kesî dikin.

Dev ji tirs û dilgiraniyên xwe yên bêwate berdin. Ev coşa Amedsporê dê bedewiyekê bibe wê lîgê.

Ji me metirsin. Çanda me dostanî û xweşbînî ye. Amedspor ji tîmekê zêdetir e, ew dengê wijdanê vî miletî ye.”

Nahît Eren ji Rûdawê re jî da zanîn ku "Amedspor di dilê Kurdan de yekemîn e."

"Têkoşîna jinan didome"

Piştî Nahît Eren, Alîkara Serokê Amedsporê Şeyda Aslantaş derket ser dikê û spasiya tîma jinan a Amedsporê kir ku niha di Lîga Super de têdikoşin û anî zimên:

“Amedspor berhema xeyalên zarok û ciwanên vî bajarî ye. Em her tim dibêjin Amedspor ji klubekê wêdetir e û îro em vê yekê nîşanî hemû cîhanê didin.

Em dê ji bo ku jin di warê werzişê û di mekanîzmayên biryardanê de zêdetir cih bigirin, têkoşîna xwe bidomînin.”

Şeva pîrozbahiyê bi stranên hunermendan û coş û govendên alîgiran heta derengê şevê dom kir.

Ev serkeftina Amedsporê li hemû parçeyên Kurdistanê û di nav Kurdên Diyasporayê de jî bû sedema kêfxweşiyeke zêde.