Sporting Lizbonê qoşa Bodo/Glimtê qetand

Hewlêr (Rûdaw) – Bodo/Glimta ku îsal di Lîga Şampiyonan de wekî ba û birûskê bû, li bin guhê dîwarekî hesinî ket.

Di qonaxa 16 tîmên dawî ya Lîga Şampiyonan a UEFAyê de, tîma Sporting Lizbonê (Portugal) piştî têkçûna maça ewil, bi vegera xwe ya dîrokî Norwecî şok kirin û derbasî çaryeka fînalê bû.

Sporting Lizbonê di maça rovanşê de 5-0 zora Bodo/Glimtê bir.

Bahoza li Portugalê

Sporting Lizbonê li mala xwe li Stadyuma Jose Alvaladeyê mazûvaniya tîma Bodo/Glimtê kir.

Tîma Portugalê maça ewil a li Norwecê 3-0 winda kiribû lê di maça duyem de avsûrkên xwe di çavên Bodo/Glimtê re derxistin û gol bi ser de barandin.

Gonçalo Inacio xuleka 34an gola yekem e Sporting Lizbonê avêt.

Nîvê yekem ê maçê 1-0 bi dawî bû.

Tîma malxwê di nîvê duyem de zexta xwe ya ji bo golê zêde kir.

Pedro Gonçalves xuleka 61ê gola duyem a tîma xwe kir.

Pişt re Suarez xuleka 78an bi penaltiyê encam kir 3-0 û.

Dema asayî ya maçê bi vê encamê bi dawî bû û lîstik dirêj bû.

Serkeftina mezin a Sportingê

Sporting Lizbonê di xulekên dirêjkirinê de serdestiya xwe parast.

Araujo di xuleka 92yan de gola çarem avêt û lîstikvanê tîma malxwê Mel jî di xuleka 120+1ê de gola dawî kir.

Sporting Lizbonê bi vê gola dawî re maç 5-0 stand.

Tîma Portugalê bi encama giştî ya 5-3 Bodo/Glimt têk bir û bilêta çaryeka fînalê berda binê berîkê.

Sporting Lizbon dê di çaryeka fînalê de bi Arsenalê re bilîze.