Şampiyoniya Raftîngê li Dêrsimê tê kirin

Dêrism (Rûdaw) - Şampiyoniya Pêşbaziya Raftîngê ya Tirkiyeyê li Dêrsima Bakurê Kurdistanê tê lidarxistin.

Pêşbaziya raftîngê ya li Çemê Munzûrê bi beşdariya 18 tîman û 300 werzişvanan didome.

Tîmên ku li vê derê serkeftî bin, dê 23-26ê Nîsana 2026an li bajarê Pau yê Fransayê beşdarî pêşbaziya raftîngê ya navneteweyî bibin.

“Parkûra herî dirêj li bajarê me ye”

Parêzgarê Dêrsimê Şefîk Aygol li ser pêşbaziyê got:

“Ji 10 parêzgehan 18 klub, 49 tîm û nêzîkî 300 werzişvanan dest bi pêşbaziyê kir. Rewş û hewa gelekî xweş e.

Helbet ji ber sedemeke girîng Çemê Munzûrê hate hilbijartin. Parkûra herî girîng û dirêj a welatê me li bajarê me ye.”

Tîma Amedê jî li Dêrsimê ye

Tîma Amedê ya raftîngê jî beşdarî pêşbaziya li Dêrsimê bû û werzişvanên wê dixwazin bi ser kevin û biçin Fransayê.

Werzişvana raftîngê Dîcle Guzelê got, “Parkûra Dêrsimê pir xweş e, pêlên wê pir xweş in.

Em wekî tîm hatine vê derê û têdikoşin. Dêrsim pir xweş e, xweza pir xweş e.”

Hacer Işika werzişvana raftîngê jî anî zimên, “Em ji Amedê beşdarî pêşbirkê dibin.

Em dixwazin di vê pêşbirkê de bibin yekem û bi serkeftî vegerin bajarê xwe.”

Gelî û Çemê Munzûrê ji bo werzişên raftîng, kano û ziplineyê jî gelekî guncaw e.

Çemê Mûnzûrê ji bo werzişa raftîngê parkûra herî dirêj a Bakurê Kurdistanê û Tirkiyeyê ye û dirêjahiya wê 36 kîlometre ye.