Hewlêr (Rûdaw) - Serokkomarê Tirkiyeyê Recep Tayyîp Erdogan, li bajarê Tiencinê yê Çînê di çarçoveya Lûtkeya 25emîn a Konseya Serokên Dewletan a Rêxistina Hevkariyê ya Shanghaiyê de bi Serokwezîrê Ermenistanê Nikol Pashinyan re civiya.
Di hevdîtinê de Wezîrê Karên Derve yê Tirkiyeyê Hakan Fîdan û Wezîrê Karên Derve yê Ermenistanê Ararat Mîrzoyan jî amade bûn.
Kêfxweşiya ji pêvajoya aştiyê
Li gorî daxuyaniya Serokatiya Ragihandinê ya Serokkomariya Tirkiyeyê, di civînê de pêwendiyên Tirkiye û Ermenistanê û gavên ku ji bo aştî û îstiqrareke mayînde li Kafkasyaya Başûr tên avêtin hatin gotûbêjkirin.
Erdogan diyar kir ku ew ji bipêşveçûna pêvajoya aştiyê ya di navbera Ermenistan û Azerbeycanê de kêfxweş e û tekezî li ser wê yekê kir ku Tirkiye piştgiriyê dide aştî, aramî û bipêşketinê ya li herêmê.
Serokkomarê Tirkiyeyê anî ziman ku ew dê piştgiriya xwe ya ji bo vê pêvajoyê berdewam bikin û da zanîn ku gavên ji bo zêdekirina hevkariya di navbera Tirkiye û Ermenistanê de jî hatine nirxandin.
Ev hevdîtin, wekî yekî ji gavên girîng ên ku di pêvajoya asayîbûnê ya li Kafkasyaya Başûr de tên avêtin, tê nirxandin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse