Trump û Erdogan rewşa Sûriyê û 'herêma aram' gotûbêj kirin

Hewlêr (Rûdaw) – Serokê Amerîkayê Donald Trump û Serokomarê Tirkiyê Recep Tayyip Erdogan di pêwendiyeke telefonî de rewşa Sûriyê û geşedanên li wî welatî û herêmê gotûbêj kirin.

Li gor medyaya Tirkiyê, Donald Trump û Recep Tayyip Erdogan di vê pêwendiya telefonî de, ku duh bi şev hatiye encamdan, pêwendiyên navbera herdu welatan û geşedanên herî dawî li Sûriyê gotûbêj kirin. Trump û Erdogan herwiha tekezî li ser giringiya piştgirîkirina li pêvajoya siyasî û têkoşîna hevbeş a li dijî terorê kirin.

Erdogan di vê pêwendiyê de hêviya xwe bo berdewamiya pêwendiyên Tirkiyê bi hevbeşên wê yên stratejîk re anî ziman.

Herwiha herdu lîderan amaje bi vekişîna hêzên Amerîka ji Sûriyê kirin û tekezî li ser wê yekê kirin, vekişîna wan hêzan bi awayê be ku di berjewendiya herdu aliyan de be û zirarê nede armancên wan ên hevbeş.

Li gor medyaya Tirkiyê, Erdogan û Trump di berdewamiya gotûbêjên xwe de behsa pêwendiyên aborî û bazirganî yên navbera herdu welatan jî kirin û tekezî li ser berfirehkirina wan pêwnediyan, bi awayekê ku bigihe armanca 75 milyar dolarî ya plankirî, kirin

Koşka Spî jî derbarê vê pêwnediya telefonî de daxuyaniyek kurt da û têde ragihand, “herdu serok, derbarê avakirina herêma aram de tekezî li ser berdewamiya hemahengiyê” di navbera herdu welatan de kirin.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger