Artêşa Almanyayê 745 êzdî û kakeyî perwerde kirin

23-07-2015

Dusseldorf (Rûdaw) - Li gor daxuyaniyeke ku Artêşa Almanyayê li ser malpera xwe belav kiriye, di navbera 21ê Hezîran û 16 Tîrmeha 2015ê de bi giştî 745 şervanên kurdên êzdî û kakeyî bi hevkariya Artêşa Almanyayê li navendên perwerdeyê yên li Hewlêr, Atrûş û Menîla hatin perwerdekirin.

Heta niha li Başûrê Kurdistanê bi giştî 2 hezar û 800 pêşmerge ji aliyê Artêşa Almanyayê ve hatine perwerdekirin.

Li gor Artêşa Almanyayê, şervan di aliyê taktîkî û meydanî de, nîşangirî û arîkariya tibî de, naskirina xefikên teqemeniyê, herwiha di mafên gelan yê hûmanîter de hatin perwerdekirin.

Li gor Artêşa Almanyayê, wan niha şandina cebilxaneyên leşkerî bo Herêma Kurdistanê bi dawî aniye û şandina qefla 3emîn ya cebilxaneyên leşkerî di 9ê Tîrmehê de pêk hatiye û bi vê yekê hemû cebilxaneyên ku di aliyê siyasî de biryara şandina wan hatibû dan, gihiştine Herêma Kurdistanê.

Lîsteya cebilxaneyên ku Artêşa Almanyayê bo pêşmergeyan şandin, wiha ye:

8.000 kumên şer,
4.000 êlekên parastinê,
4.000 berçavkên parastinê,
700 bêtêl,
680 Dûrbînên şevê,
2.500 dûrbînên du-lûle,
1.000 maskeyên parastina ji çekên kîmyewî
15 seyarên veguhestina şervana ji cûreyê DINGO 1,
40 qamyonên ji cûreyê 2t UNIMOG,
60 qamyonên ji cûreyê WOLF,
10 seyarên hawarçûna bijîşkî ji cûreyê UNIMOG,
25 mutfexên seyar,
125 kon,
12.080 tifingên ji cûreyê G3,
50 keleşkofên ji cûreyê MG3,
8.000 tifingên ji cûreyê G36,
8.040 demançeyên ji cûreyê P1,
60 antîtankên ji cûreyê MILAN ligel 1.000 rokêtan,
400 antîtankên ji cûreyê Panzerfaust 3,
20.000 narîncok,
100 demançeyên sînyalan,
Fîşekên demançe û tifing û antîtankan
Meteryalên tibî
Parçeyên tamîra çek û seyareyan

Artêşa Almanyayê herwiha diyar dike ku wan 2000 kumên şer, 3000 maskeyên parastina ji çekên kîmyewî, meteryalên tibî û kincên leşkerî dane artêşa Iraqê jî.

Artêşa Almanyayê herwiha diyar kiriye ku kincên leşkerî yên zivistanê jî amade ne û ewê di payîzê de ji bo Hikûmeta Herêma Kurdistanê re bên şandin.