Petrola Rûsyayê biha bûye lê dîsa jî kêmasiya budceyê heye
Moskow (Rûdaw) - Ji destpêka şerê li Îranê ve, bihayê bermîleke petrola Rûsyayê ya Uralsê ji 60 dolarî derketiye derdora 100 dolarî.
Tevî bilindbûna bihayê petrolê jî li Rûsyayê bihayê kel û pelan û bi taybetî jî bihayê berhemên xwarinê giran dibe.
Li gorî Ajansa Amaran a Rûsyayê (Rosstat), ji destpêka îsal ve bihayê hêkan nêzîkî ji sedî 23, bihayê goştê dewaran ji sedî 7, bihayê şekir nêzîkî ji sedî 6 û bihayê goştê masiyan jî zêdetirî ji sedî 4 giran bûye.
"Mûçeyên me zêde nabin"
Karmendê dewletê Guzel Safarovayê li ser vê mijarê got:
“Bihayê berhemên xwarinê rojane giran dibe.
Ji me re dibêjin ku sedem bilindbûna bihayê sotemenî û veguhastinê ye lê mûçeyên me zêde nabin, loma jî bargiranî dikeve ser milê me.
Ez fêm dikim ku rewşa aboriyê ya li welêt gelekî dijwar e û piraniya budceyê ji bo Operasyona Taybet tê xerckirin.
Ji ber ku divê em bi ser kevin, loma giranbûna xwarinê tiştekî asayî ye.
Temenê min têra xwe mezin e û ez mirovên gelekî hejar û hewcedar li derdora xwe nabînim.”
Xanenişîn Andrey Jukov jî nerîna xwe wiha anî zimên:
“Giranbûna bihayê xwarinê ne tiştekî nû ye, em êdî hînî vê yekê bûne.
Biha bi berdewamî giran dibe. Sedem jî ew rewş e ku her kes pê dizane.
Ez bawer im tê fêmkirin bê ez behsa çi dikim.”
Girtina Tengava Hurmizê
Parlamenterekî Dumayê qebûl dike ku girtina Tengava Hurmizê bûye sedema bilindbûna bihayê kel û pelên hawirdekirî lê ew dibêje ku rewşa li Rûsyayê ne ew qasî krîtîk e.
Alîkarê Serokê Komîteya Aboriyê ya Dumayê Artyom Kiryanov ragihand:
“Bê guman, em dibînin ku biha giran dibin. Em dibînin ku bihayê jêderên vejenê giran dibe û lêçûn jî zêde dibin.
Ev hemû dibin sedema giranbûna bihayê hinek berhemên xwarinê û kel û pelên cuda.
Lê bihayê hinek berheman jî erzan dibe. Wate, rewşeke wisa nîne ku em bibêjin enflasyon gihiştiye asteke gelekî bilind û kel û pel ji nişka ve giran bûne.”
Kêmasiya budceyê 5 trilyon ruble ye
Aborînas texmîn dikin ku bilindbûna bihayê petrolê û lawazbûna dorpêçan, dahata budceya Rûsyayê rojane 100 milyon dolarî zêde dike.
Lê belê ev yek kêmasiya budceya Rûsyayê tije nake.
Li gorî Wezareta Darayî ya Rûsyayê ev kêmasî gihiştiye dora 5 trilyon rubleyan, ango ji sedî 2yê Berhema Navxweyî ya Giştî (GDP).