Mi Pezê berpirsê kuştina 21 kesan hat girtin
Hewlêr (Rûdaw) - Li Kolombiyayê Jose Alex Vitoncoyê bi nasnavê "Mi Pez" ê ku berpirsê êrişeke bi bombeyan a 25ê Nîsanê bû hat girtin. Di wê êrişê de 21 kes miribûn.
Serokkomarê Kolombiyayê Gustavo Petro girtina Mi Pez li ser hesabê xwe yê Xê piştrast kir.
Rayedaran ragihand ku Mi Pez li gundê Tablonesê yê bajarê Palmirayê bi operasyoneke hevbeş a polîs û artêşê hatiye desteserkirin.
Zêdetirî 40 çalakiyên tundiyê pêk anîne
Wezîrê Parastinê Pedro Sanchez diyar kir ku Mi Pez beşdarî zêdetirî 40 çalakiyên tundiyê yên li dijî sivîl û hêzên ewlehiyê bûye.
Sanchez destnîşan kir ku ew kes berpirsê sereke yê komkujiyên gundî, jin, zarok û serkirdeyên civakî yên li başûrrojavayê welêt e.
Li gorî agahiyên ku wezîr dane, Mi Pez serkêşiya komeke xeternak a bi 600 endamî dikir.
Tohmetên li ser Mi Pez
Li ser Mi Pez gelek tohmetên wekî terorîzm, kuştin, avakirina rêxistina sûc, çêkirin û qaçaxçîtiya çekan hene.
Her wiha ew bi qaçaxçîtiya narkotîkê û şandina madeyên hişbir ya nav Amerîkayê jî tê tawanbarkirin.
Bûyer çi bû?
Li başûrrojavayê Kolombiyayê 25ê Nîsanê êrişeke bi bombeyan hatibû kirin.
Di wê êrişê de 21 kes miribûn û zêdetirî 40 kesî jî birîndar bûbûn.
Hatibû ragihand ku endamên berê yên Hêzên Çekdar ên Şoreşger ên Kolombiyayê (FARC) tûpên tije teqemenî avêtine ser otobusekê.
Li gorî medyaya welêt, komên EMCyê li hinek bajarên li herêmên Cauca ve Valle del Caucayê di nav 48 saetan de zêdetirî 30 êrişên cuda yên bi bombeyan pêk anîbûn.