20%ـی پێڵاوی تورکیا لە دیلۆکی باکووری کوردستان دروستدەکرێن

 

پیشەسازیی پێڵاو، پیشەیەکی سەرەکییە لە دیلۆکی باکووری کوردستان، لەساڵی 2020 بە بڕی 101 ملیۆن دۆلار پێڵاو و نەعل لەو پارێزگایەوە هەناردەی دەرەوەی وڵات کراوە.

 

محەممەد ئەمین ئینجێ، سەرۆکی ژووری پیشەسازانی دیلۆک رایگەیاند، دیلۆک بووەتە شوێنێکی تایبەت لە تورکیا بۆ دروستکردنی پێڵاو و نەعل و بە تەنیا ساڵانە نزیکەی 20%ـی پێڵاو و نەعلەکانی دروستکراو لەو وڵاتە، هەناردە دەکات.

 

هەناردەکردنی پیڵاو و نەعلی دیلۆک لەساڵی 2019 بڕی 124 ملیۆن دۆلار بووە. پێشبینی دەکرا لە ساڵی 2020 بەرزتر بێتەوە، بەڵام بەهۆی پەتای کۆرۆناوە بۆ 101 ملیۆن دۆلار دابەزیوە و لەو ساڵەدا 106 ملیۆن جووت پێڵاو و نەعل لەو پارێزگایەوە هەناردەی دەرەوە کراون.

 

وڵاتانی رۆژهەڵاتی نێوەڕاست زۆرترین هاوردەکاری پێڵاوی تورکی بوون، بەتایبەت عێراق. محەممەد ئەمین ئینجێ دەڵێت، وڵاتانی ئاسیای ناوین و رووسیا لەدوای رۆژهەڵاتی نێوەڕاست لە پلەی دووەمی هاوردەکارانی پێڵاوی تورکیان.

 

بەگوتەی سەرۆکی ژووری کار و پیشەسازیی دیلۆک، ئامانجی خاوەنکار و بەرهەمهێنەرانی پێڵاو لە دیلۆک ئەوەیە کە تاوەکو ساڵی 2023 هەناردەکردنی ساڵانەیان بگاتە 500 ملیۆن دۆلار.