گولاڤ ئۆمەری کلیپێکی نوێ بڵاودەکاتەوە

لەو بارەیەوە گولاڤ ئۆمەری لە بەرنامەی دیاسپۆرای رووداو گوتی: "گۆرانییەکی نوێم بە ناوی 'وسا' لەسەر ماڵپەڕی یووتیوب بڵاوکردەوە، گۆرانییەکە تێکست و ئاوازی مامۆستا نووح سلێمانە، و لە ستۆدیۆی مامۆستا ئەلند یوسف تۆمارکراوە، مامۆستا فیراز حوسێنی میکس و ماسترینەگەکەی کردووە".

سەبارەت بە کلیپەکە گولاڤ گوتی، "کلیپی گۆرانییەکە لە شاری کۆڵن وێنەگیراوە و تەیم ئادەمس دەرهێنەری فیلمی نێودەوڵەتی کاری دەرهێنەریی بۆ کردووە و زۆر بەدڵمە، هەروەها شەهناز بیووتی کاری مەیکپ ئارتیستی بۆ کردووم لە کلیپەکە."

سەبارەت بە جیاوازی کلیپەکە لەگەڵ ئەوانی دیکەی گولاڤ دەڵێت: "جیاوازی کلیپەکە ئەوەیە کە ئەمە بە پرۆفێشناڵی دروستکراوە."

گولاڤ ئۆمەری ئاشکرایکرد، نوح سلێمان چەندین گۆرانی بۆ ناردووە و لە نێوان هەموویاندا ئەم گۆرانییەی هەڵبژاردووە و بڕیاریداوە بیڵێت و بیکاتە کلیپ.

گولاڤ ئۆمەری لەناو خێزانێکی هونەرمەند گەورەبووە و لەوێوە فێری میوزیک و گۆرانی بووە و زۆر پەیوەستە بە باوکییەوە، کە ئەویش گۆرانیبێژ و هونەرمەندە.

گولاڤ گوتیشی: "پێشتر لەگەڵ باوکم گۆرانیم دەگوت، دوای ئەوەی هاتینە ئەوروپا؛ لە 2018 لەسەر تۆڕە کۆمەڵایەتییەکان گۆرانی دەڵێم و واتە بەشێوەیەکی پرۆفێشناڵانە کاری هونەری دەکەم".

سەبارەت بە باوکی دەڵێت، "باشترین مامۆستای هونەری لەلام باوکمە و نموونەی گۆرانیبیژی منیش ئایشەشانە".

گولاڤ روونیکردەوە، زۆر پرۆژەی هونەری دیکەی هەن لەوانە چەند گۆرانییەک کە لەلایەن باوکیەوە بۆی ئامادەکراون و لە نزیکترین کاتدا کارەکانی تەواو دەکات و دواتر هەوڵدەدات بیکاتە کلیپ.