20ـەمین فێستیڤاڵی شانۆی کوردی لە سەقز بەڕێوەدەچێت

فێستیڤاڵی شانۆی کوردی لە سەقز رۆژی چوارشەممە 10-12-2025 دەستپێدەکات و تاوەکو یەکشەممەی داهاتوو بەردەوام دەبێت و شانۆکارانی رۆژهەڵات، باشوور، باکوور و رۆژئاوای کوردستان بەرهەمەکانیان نمایش دەکەن و لە کۆتاییدا خەڵاتی باشترین شانۆ، باشترین ئەکتەری ژن و پیاو، باشترین دەرهێنان و کۆمەڵێک خەڵاتی دیکە دەبەخشرێت بە شانۆکارانی سەرکەوتوو.

حەمیدڕەزا خۆشبەخت، سکرتێری جێبەجێکاری بیستەمین خولی فێستیڤاڵی شانۆی کوردیی سەقز رایگەیاند، 39 بەرهەم بۆ بەشی نمایش و کێبەرکێی فێستیڤاڵەکە نێردرابوون و لیژنەی دادوەران شەش بەرهەمی دەرەوە و حەوت بەرهەمی نێوخۆیان هەڵبژاردووە بۆ نمایشکردن و بەشدارییان لە بەشی پێشبڕکێ. 

سێ بەرهەمی شانۆکارانی دهۆک و هەڵەبجە، دوو بەرهەم لە رۆژئاوای کوردستان و بەرهەمێک لە شاری ماردینی باکووری کوردستان لەو فێستیڤاڵەدا بەشدار دەبن. هەروەها حەوت بەرهەمیش لە شارەکانی سنە، بیجاڕ، کرماشان، ورمێ، دیواندەرە و بەرهەمێکی هاوبەشی سەقز و مهابادیش لە فێستیڤاڵەکەدا نمایش دەکرێن.

رێوڕەسمی پەردەلادان لەسەر پۆستەر و پۆرتاڵی فێستیڤاڵەکە شەوی دووشەممە لە سەقز بەڕێوەچوو. قوتبەدین سادقی، سکرتێری بیستەمین خولی فێستیڤاڵی شانۆی کوردیی سەقز لە رێوڕەسمی دەستپێکردنی فێستیڤاڵەکەدا رایگەیاند، ئەو فێستیڤاڵە گۆڕەپانێک نییە بۆ کێبڕکێ، بەڵکو دەرفەتێکە بۆ هاودڵی و لێکنزیکبوونەوەی زیاتری هونەرمەندان و بە تایبەت شانۆکارانی هەموو کوردستان لە یەکتر و ئاڵۆگۆڕی بیروڕا و بیرۆکەکانیان.

بەپێی خشتەی فێستیڤاڵەکە، رۆژانە چوار شانۆ نمایش دەکرێن و لە پەراوێزی فێستیڤاڵەکە، پێشبڕکێی خۆشنووسی و شانۆنامەنووسی و هەروەها پێشانگەی وێنە و نیگارکێشیش بەڕێوەدەچێت.