رووداو دیجیتاڵ
هونەرمەند ئەیوب عەلی لەگەڵ هونەرمەند گارە سازکار نوێترین بەرهەمی خۆیان بەناوی (ئاڵای کوردستان) بڵاوکردەوە. ئەیوب عەلی دەڵێت، تێکستەکەی سادەیە بۆ ئەوەی منداڵان لەبەری بکەن و هەستی نەتەوەییان لا دروستبێت.
سێشەممە، 16ـی کانوونی یەکەمی 2025، ئەیوب عەلی لە بووڵتەنی کاژێر 08:00ـی تۆڕی میدیایی رووداو میوان بوو، سەبارەت بە بەرهەمە نوێیەکەی گوتی: "ئاواز و تێکستی ئەم گۆرانییە هی خۆمە. مەبەستی سەرەکیم پیشاندانی شانازی بوو، چ بە کوردایەتی و چ بە ئاڵاکەی خۆمان."
ئەیوب عەلی گوتی: "لە رێگەی ئەم گۆرانییەوە دەتوانین وابکەین نەوەی نوێ بەتایبەتی لە منداڵەکانەوە دەستپێبکەن. هەندێک وشەی سادەم نووسی تاوەکو منداڵان وەریانبگرن و لەگەڵی بژین، چونکە کە لە منداڵییەوە هەستی نەتەوەیی هەبوو، تاوەکو گەورە دەبێت لەبیری ناچێتەوە."
هونەرمەند ئەیوب عەلی ئاماژەی بەوەشکرد، ئامانجیان پاراستنی کولتووری کوردییە و گوتی: "بۆ زمانی کوردی، کولتووری کوردی و جلوبەرگی کوردی، ئەم بەرهەمەمان دروستکرد. هیوادارم ئەم بەرهەمە لە ئاستی بەرزی و شکۆی ئاڵایەکدا بێت کە بەرهەمی خوێنی هەزاران شەهیدە لە هەر چوار پارچەی کوردستان."
بەرهەمەکە بە شێوەی دوێتە لەگەڵ هونەرمەند (گارە سازکار)ە. لەو بارەیەوە ئەیوب عەلی گوتی: "مامۆستا گارە بەر لەوەی بیناسم بە دەنگی سەرسام بووم. من دەزانم چەند سەنگینە و چ بەرهەمێکی لایە، نزیکەی سێ بۆ چوار هەزار گۆرانی لایە کە فۆڵکلۆری هەموو ناوچەکانی کوردستانن. شانازی دەکەم کە لەم بەرهەمە بە [دەنگە] پڕ لە سۆزەکەی میوان بوو."
کلیپی (ئاڵای کوردستان) ئەمشەو لە چەناڵی یوتیووبی ئەیوب عەلی بڵاوکرایەوە. بڵاوکردنەوەی ئەم بەرهەمەش لەکاتێکدایە، رۆژی چوارشەممە 17-12-2025 رۆژی ئاڵای کوردستانە و بڕیارە لە سەرجەم خوێندنگە و دامودەزگا فەرمییەکانی هەرێمی کوردستان بە مەراسیمی جۆراوجۆر بەرز رابگیرێ.
پێشتریش ئەو دوو هونەرمەندە گۆرانییەکیان بەناوی (کوردم) بڵاوکردەوە کە بینەرێکی زۆری هەیە.
.png&w=3840&q=75)
