رووداو دیجیتاڵ
بانکی ناوەندیی عێراق نزیکەی 223 ملیۆن دۆلاری فرۆشت؛ لەو بڕە 46 ملیۆن و 500 هەزار دۆلاری بە نەختینە داوەتە بانکەکان.
رۆژی چوارشەممە 2ـی ئابی 2023، بانکی ناوەندیی عێراق 222 ملیۆن و 888 هەزار و 377 دۆلاری فرۆشت؛ لەو بڕە 46 ملیۆن و 500 هەزار دۆلاری بە نەختینە و ئەوی دیکەی بۆ حەواڵەیە.
ئەمڕۆ چوارشەممە کاژێر 11:00ـی بەیانی، حاجی سابیر باواجی، ئەندامی ئەنجوومەنی گۆڕینەوەی دراو لە هەولێر بە تۆڕی میدیایی رووداوی گوت، 100 دۆلار بە 151 هەزار و 500 دینار مامەڵەی پێوە دەکرێت.
ئەوە لەکاتێکدایە کە ئەمڕۆ لە کاتی کردنەوەی بازاڕەکانی ئاڵوگۆڕی دراودا 100 دۆلار بە 152 هەزار دینار مامەڵەی پێوەکرا.
باواجی ئاماژەی بەوەشکرد، 100 دۆلار بەرامبەر 4 ملیۆن و 950 هەزار تمەنی ئێرانییە.
چەند رۆژێکە بەهای دینار بەرامبەر دۆلار دابەزینی زۆری تۆمارکردووە، بە جۆرێک هەفتەی پێشوو 100 دۆلار گەیشتە 158 هەزار دینار و دواتر دابەزییەوە بۆ خوار 150 هەزار دینار.
بانکی ناوەندیی عێراق رۆژانە 100 دۆلار بە 131 هەزار دینار دەفرۆشێت، بەڵام نەیتوانیوە بەهای دینار لە بازاڕەکاندا بەرامبەر بە دۆلار بەرزبکاتەوە.
