رووداو دیجیتاڵ
ئێران دەروازەکانی هەناردەکردنی گۆشت بۆ هەرێمی کوردستان ناهێڵێت، تورکیاش نرخی گومرگی بەرزدەکاتەوە. بازرگانێک دەڵێت، چاوەڕێ دەکەن بۆ مانگی رەمەزان نرخی گۆشت گرانتر ببێت.
سەرەڕای ئەوەی ئەنجوومەنی ئابووریی عێراق بڕیاریداوە گومرگی سەر هاوردەکردنی گۆشتی سوور بە رێژەی 50% کەمببێتەوە، بەڵام نرخی گۆشتی سوور بە رێژەیەکی زۆر کەم دابەزیوە و هێشتا نرخی کیلۆیەک گۆشتی سوور بە نزیکەی 22 بۆ 23 هەزار دینار لە بازاڕەکاندا دەفرۆشرێت.
پێشتر ئاژەڵ لە رووسیا و جۆرجیا بۆ بەخێوکردن لە رێگەی ئێرانەوە هاوردەی هەرێمی کوردستان دەکرا، بەڵام ئێستا ئێران رێگە بە هەناردەکردنیان بۆ هەرێمی کوردستان نادات. بە گوتەی ئیدریس سورچی کە بازرگانی گۆشتە لە هەولێر، ئەوە کاریگەری زۆری هەبووە لەسەر بەرزبوونەوەی نرخی گۆشت.
ئێستا تەنیا لە وڵاتی بەرازیلەوە ئاژەڵی گەورە هاوردەی هەرێمی کوردستان و عێراق دەکرێت، بە ماوەی 25 رۆژیش دەگاتە مێرسین.
رۆژی چوارشەممە، ئیدریس سورچی کە بازرگانی گۆشتە، میوانی بووڵتەنی ئابووریی بوو، گوتی، لە تورکیا کرێی گواستنەوە و گومرگی جوانەگا زۆر گرانبووە، گومرگی یەک جوانەگا لە 10 دۆلارەوە بەرزبووەتەوە بۆ 150 دۆلار، پار کیلۆیەک گۆشتی گوێرەکە ئەگەر هاووڵاتیی لە بازاڕ بیکڕیبایە، 14 بۆ 15 هەزار دینار بوو، ئێستا بە کەمتر لە 20 هەزار دینار دەست ناکەوێت.
لە هەرێمی کوردستان تەنیا یەک بازرگان ماوە کە جوانەگای هەبێت ئەویش لە شاری زاخۆیە، ئەمە بە گوتەی ئیدریس سوورچی. دەڵێت، ئەو بازرگانەش تەنیا نزیکەی 2000 سەر جوانەگای ماوە، هەموو شارەکانی کوردستان داواکارییان لەسەر هەیە، بۆیە بۆ مانگی رەمەزان چاوەڕێ دەکەین نرخی گۆشت زیاتر بەرزببێتەوە.
هۆکاری بەرزبوونەوەکە ئەوەیە، بەرهەمی نێوخۆ زۆر کەمیکردووە و خەڵک ئاژەڵداری ناکەن.
ئێستا خواست لەسەر گۆشتی سوور زۆرە و بەرهەمی نێوخۆیش زۆر کەمە، تەنیا سلێمانی رۆژانە پێویستی بە زیاتر لە 90 تۆن گۆشتی سوور هەیە و مانگانە نزیکەی دوو هەزار و 700 تۆن گۆشت دەبێت، لە بۆنە و جەژنەکانیشدا خواست زیاتر دەبێت.
ئەرکان عەلی لە بازاڕی بەر بەلەدییەکەی سلێمانی کە وەک بازاڕی گۆشتی سلێمانی دەناسرێت، لەگەڵ گۆشتفرۆشێک قسەی کرد، ئەو گوتی، نرخی زیندەقەپان 500 دینار هەرزان بووە بۆیە ئەمڕۆ نرخی گۆشت نزیکەی 1000 دینار دابەزیوە، نرخی گۆشتی بەرخ 23 هەزار دینارە، گۆشتی گوێرەکەش لەنێوان 20 بۆ 22 هەزار دینارە.
لە هەرێمی کوردستان، 100 پڕۆژەی دابەستەکردنی گۆلک هەن و 78 هەزار و 216 سەر گۆلکیان دابەستەکردووە.
بەپێی ئامارێکی بەڕێوەبەرایەتیی سامانی ئاژەڵ لە وەزارەتی کشتوکاڵ و سەرچاوەکانی ئاوی هەرێمی کوردستان، لە هەرێمی کوردستان پێنج ملیۆن مەڕ و بزن و 250 هەزار گا و مانگا هەن.
