بەشێکی پارەی مووچە لە بەغداوە گەیشت

                                            

لە راگەیێندراوێکدا وەزارەتی دارایی و ئابووریی حکومەتی هەرێمی کوردستان ئەمڕۆ (سێشەممە، 9-7-2024) رایگەیاند "کەمێک لەمەوبەر 421 ملیار و 760 ملیۆن دینار وەک بەشێک لە شایستەی مووچەی مانگی حوزەیرانی فەرمانبەرانی شارستانیی هەرێمی کوردستان خرایە سەر هەژماری بانکیی وەزارەتی دارایی و ئابووری لە لقی هەولێری بانکی ناوەندیی عێراق." 

رۆژی یەکشەممەی ئەم هەفتەیە (7ـی تەممووز) دەست بە دابەشکردنی مووچەی مانگی حوزەیران کرا. دوای ئەوەی حکومەتی عێراق بڕی 231 ملیار و 405 ملیۆن و 531 هەزار دیناری وەکو بەشێک لە شایستەی مانگی حوزەیرانی کەسوکاری شەهیدان و ئەنفالکراوان، زیندانیانی سیاسی، خاوەن پێداویستییە تایبەتەکان و خانەنشینانی شارستانی و سەربازی نارد.   

سەبارەت بە مووچەی هێزە ئەمنییەکان، وەزیری دارایی هەرێمی کوردستان دەڵێت، "لێکتێگەیشتن و بەرەوپێشچوون" بۆ چارەسەری کێشەی مووچە هەیە و چەند جارێک وردبینی لە لیست و ناوی هێزە ئەمنییەکان کراوە.

ئاوات شێخ جەناب، وەزیری دارایی و ئابووریی هەرێمی کوردستان دوێنێ رایگەیاندبوو "هەرچەندە بە پێی بڕیاری دادگای فیدراڵی، نابێت هیچ کێشە و هۆکارێک ببێتە هۆی دواکەوتن و نەدانی مووچە، بەڵام بە بیانووی وردبینییەوە، هەموو مانگێک کێشەیەکی نوێ بۆ مووچە دروست دەکەن، لەکاتێکدا بەپێی یاسای بودجە دەبێت سێ مانگ جارێک وردبینی لەخەرجی و داهات بکرێت."

عێراق تاوەکو ئێستا عێراق لیستی مووچەی هێزە ئەمنییەکانی هەرێمی کوردستانی بۆ مانگەکانی ئایار و حوزەیران پەسند نەکردووە، بەڵام پێشنیازێک خراوەتە بەردەم سوودانی کە بەبێ چارەسەرکردنی تێبینییەکانی وەزارەتەکە، ئەو دوو مووچەیە خەرج بکات.