رووداو دیجیتاڵ
دەستەی گومرگەکانی عێراق دەڵێت، داهاتی گومرگی 9 مانگی سەرەتای ئەم ساڵ زیاتر لە 1 تریلیۆن و 500 ملیار دینار بووە؛ پێشبینیش دەکات داهاتەکە تاوەکو کۆتایی ساڵ بگاتە سەروو دوو تریلیۆن دینار.
حەسەن عگێلی، سەرۆکی دەستەی گشتیی گومرگەکانی عێراق بە تۆڕی میدیایی رووداوی راگەیاند، دەستەکەیان کۆمەڵێک چاکسازیی کارگێڕی و رێکخستنی کردووە و ئەوەش وایکردووە، داهات زیاد بێت.
بە گوێرەی ماڵپەڕی فەرمیی دەستەی دەروازە سنوورییەکانی عێراق، جگە لە هەرێمی کوردستان، عێراق 20 دەروازەی سنووری هەیە؛ 11 وشکانی، 6 ئاوی و سێ ئاسمانی.
حەسەن عگێلی دەڵێت، "لە ساڵی 2022دا کۆی گشتیی داهاتی دەستەکەمان 807 ملیار دینار بوو. ساڵی 2023 گەیشتە 1.33 ترلیۆن دینار".
سەبارەت بە داهاتی ئەم ساڵ، حەسەن عگێلی گوتی، لە 9 مانگی ئەم ساڵدا دوای جێبەجێکردنی سیستمی ئەلیکترۆنی و پێداچوونەوە بە زۆر رێکاری دەستەکە، داهات زیادیکردووە.
حەسەن عگێلی رایگەیاند،"تاوەکو کۆتایی مانگی ئەیلوول داهاتمان گەیشتووەتە 1.550 تریلیۆن دینار. هێشتا نزیکەی سێ مانگی ماوە و پێشبینی دەکەین بگاتە 2 تریلیۆن دینار".
سەرۆکی دەستەی گشتیی گومرگەکانی عێراق باس لەوە دەکات، "داهاتی گومرگی 9 مانگی ئەم ساڵ بەراورد بە ساڵی 2022، 100٪ زیادی کردووە، لەگەڵ ئەوەشدا ئەم ساڵ 3 مانگ ماوە" .
سەرۆکی دەستەی گشتیی گومرگەکان دەڵێت، دەستەکەیان سیستمی ئەسکودای گومرگی جیهانی لە 9 دەروازە جێبەجێکردووە کە لە 107 وڵات جێبەجێ دەکرێت و عێراقیش دەبێتە 108مین، ئەوەش وایکردووە داهات زیاد بکات.
.jpg&w=3840&q=75)