رووداو دیجیتاڵ
بەهای دینار بەرامبەر دۆلار لە بازاڕەکانی هەرێمی کوردستان دابەزیوە و 100 دۆلار بە 143 هەزار و 500 دینار مامەڵەی پێوەدەکرێ. سەرۆکی ئەنجوومەنی بازاڕی دراوی هەولێر هۆکارەکەی بۆ پشووەکانی سەری ساڵ و کەمبوونەوەی خستنەڕوو دەگەڕێنێتەوە.
رۆژی سێشەممە، 30ـی کانوونی یەکەمی 2025، سیامەند مەولوود بە تۆڕی میدیایی رووداوی راگەیاند: "هەفتەیەکە بەهای دینار رووی لە دابەزین کردووە، بە جۆرێک هەفتەی رابردوو هەر 100 دۆلار بە 142 هەزار و 500 دینار مامەڵەی پێوەکرا، بەڵام ئێستا گەیشتووەتە 143 هەزار و 500 دینار."
سەبارەت بە هۆکارەکانی ئەو بەرزبوونەوەیە، سیامەند مەولوود ئاماژەی بەوە کرد، دانانی پارە لە بانکەکان کەمبووەتەوە: "بەهۆی نزیکبوونەوەی سەری ساڵ و پشووەکانەوە، خستنەڕووی دۆلار کەمبووەتەوە و لە بەرامبەردا خواست لەسەری زیادی کردووە، ئەمەش هۆکاری سەرەکیی گۆڕانکاریی بەهاکەیە."
سەرۆکی ئەنجوومەنی بازاڕی دراوی هەولێر گەشبینە بەوەی ئەم بەرزبوونەوەیە کاتی بێت و رایگەیاند: "پێشبینی دەکەین دوای تەواوبوونی پشووەکانی سەری ساڵ، بەهای دینار جارێکی دیکە روو لە بەرزبوونەوە بکات."
