رووداو - تەندروستی
توێژینەوەیەکی سکوڵی پزیشکیی زانکۆی وەیک فۆرێست لە ئەمریکا ئاشکرای دەکات، کۆنتڕۆڵکردنی پەستانی خوێن، مەترسیی تووشبوون بە لاوازیی بیرکردنەوە و دابەزینی توانای مێشک لە درێژخایەندا کەمدەکاتەوە.
لە توێژینەوەکەدا زیاتر لە 4 هەزار و 233 کەس بەشدارییان کردووە، و توێژەران پێشبینی ئەوە دەکەن، دەکرێت تا ساڵی 2030 زیاتر لە 9 ملیۆن ئەمریکی تووشی دابەزینی توانای مێشک ببن، هەروەها تاوەکو ساڵی 2040 ئەم ژمارەیە بگاتە نزیکەی 12 ملیۆن کەس.
دکتۆر خۆسێ مۆراڵێس، پسپۆڕی مێشک و دەمار لە سەنتەری تەندروستیی سانت جۆنز لە سانتا مۆنیکا دەڵێت: "بەرزیی پەستانی خوێن زیانی گەورە بە مێشک دەگەیێنێت، هەرچەندە زیاتر پەیوەندیی بە جەڵتەوە هەیە، بەڵام کاریگەریی نەرێنی لەسەر تواناکانی بیرکردنەوەش دروستدەکات."
دکتۆر خۆسێ دەشڵێت: پەستانی خوێنی بەرز کاریگەریی درێژخایەنی لەسەر تەندروستیی مێشک هەیە و پێویستە کۆنتڕۆڵ بکرێت.
بەگوێرەی ناوەندی کۆنتڕۆڵ و پێشگیری لە نەخۆشییەکان لە ئەمریکا، زیاتر لە نیوەی دانیشتوانی ئەمریکا پێش تەمەنی 50 ساڵی تووشی بەرزەپەستانی خوێن دەبن.
