رووداو - تەندروستی
پزیشکێکی پسپۆڕی نەخۆشییەکانی هەرس و جگەر، دەڵێت، شێوازی نادروستی خەوتن هۆکارە بۆ گەڕانەوەی ترشەڵۆکی گەدە.
د. شوبهام ڤاتسیا، راوێژکاری باڵای نەخۆشییەکانی هەرس و جگەر لە نەخۆشخانەی فۆرتیس لە هیندستان، دەڵێت؛ شێوازی خەوتن و ئاستی نزمی سەر لەکاتی خەوتن کاریگەری راستەوخۆی هەیە لەسەر نەخۆشی گەڕانەوەی ترشەڵۆکی گەدە.
ئەم پسپۆرە دەڵیت؛ گەڕانەوەی ترشەڵۆکی گەدە کاتێک روودەدات کە ماسولکەی خوارووی سوورێنچک لاواز دەبێت، کە دەبێتە هۆی گەڕانەوەی ترشی گەدە بۆ سوورێنچک.
د. شوبهام باس لە نیشانەکانی نەخۆشییەکە دەکات و دەڵێت: سووتانەوە لە ناوچەی سنگ، گەڕانەوەی خۆراک، هەستکردن بە ناڕەحەتی لە سنگدا، هەڵئاوسان، ئازار و سووتانەوەی قوڕگ، کۆکەی درێژخایەن، نیشانەی نەخۆشییەکەن.
د. شوبهام، گوتی کە ''گۆڕینی شێوازی ژیان و نزمی سەر لەکاتی خەوتن رۆڵێکی گرنگ دەگێڕێت لە چارەسەرکردن و خۆپاراستن لەم نەخۆشییە''، هەروەها گوتیشی: خۆتان بپارێزن لە خواردنی خۆراک لە درەنگانی شەودا.
