رووداو - تەندروستی
توێژینەوەیەک لە کەلار کراوە دەریدەخات، رێژەی قەڵەوی لەنێو منداڵان 50٪ لە ئاستی ستاندارد زیاترە. زۆرینەی ئەو دایکانەی تەمەنییان لە 35 ساڵ کەمترە منداڵەکانییان قەڵەون و رێژەی قەڵەوی لەنێو منداڵانی ئەو ناوچەیە سەروو ئاستی ستانداردە.
سەرپەرشتیاری ئەم توێژینەوە نێوخۆییە ئەمڕۆ سێشەممە 15-4-2025 بە رووداوی راگەیاند، 403 منداڵی شاری کەلاریان وەرگرتووە و دەرکەوتووە کە زۆرترین ئەو منداڵانەی تەمەنیان دوو تاوەکو شەش ساڵان بووە قەڵەون.
هەواڵ لەتیف، پسپۆڕی خۆراک و سەرپەرشتیاری توێژینەوەکە دەڵێت: ئەوانەی تەمەنیان دوای دوو ساڵییەوە بوو زیاتر قەڵەو بوون بەراورد بەو کێشەی رێکخراوی تەندروستیی جیهانی دایناوە.
هەواڵ لەتیف هۆکارەکانی گەڕاندەوە بۆ 'خراپیی و ناتەندروستیی خۆراکەکان، لایەنی دارایی دایک و باوک و بچووکیی تەمەنی دایکان.
ئەو روونی دەکاتەوە، ئەو ماڵباتانەی باری داراییان باش بووە، زیاتر منداڵەکانیان قەڵەو بووە بەراورد بەوانەی باری داراییان خراپ بووە.
قەڵەوی هۆکارێکە بۆ؛
* شەکرە
* بەرزەپەستانی خوێن
* بەرزیی کۆلیستڕۆڵ
* جەڵتەی دڵ
* گیرانی لوولەکانی خوێن
* جەڵتەی مێشک
* بەشەمێبوونی جگەر
* پووکانەوەی ئێسکەکان
* لاوازیی سێکسی
