رووداو - تەندروستی
دەرمانێکی نوێ بایەخی زیاتری پێدەدرێت و بە یەکێک لە رێگە کاریگەرەکان بۆ چارەسەری نەخۆشیی دەگمەنی هیمۆفیلیا دادەنرێت، دەرمانەکە لە چین تاقیدەکرێتەوە و وەکو چارەسەری بنبڕی نەخۆشییەکە بەکاردێت.
دەرمانەکە لەلایەن لقی شەنگهای کۆمپانیای بیلیڤ بایۆمێدەوە بەرهەمدەهێندرێت و لەڕێگەی دەرزیەوە دەبێت کە ڤایرۆسێکی دەستکاریکراو کە هەڵگری جینی بەرپرس لە خوێنمەینە دەخرێتە نێو جەستەی تووشبووەوە، بەمەش نەخۆشەکە ئەو جۆرە پڕۆتینەی کە بۆ خوێنمەین پێویستە ، دروستدەکات.
بەپێی فیدراسیۆنی جیهانیی هیمۆفیلیا، نەخۆشییەکی بۆماوەیی دەگمەنەوە و خوێنمەین کەمدەبێتەوە، چونکە فاکتەرەکانی خوێنمەین دروستنابن. زیاتر پیاوان تووشیان دەبێت و لە جیهاندا زیاتر لە 270 هەزار تووشبوو تۆمارکراون، لەو ژمارەیەش 40 هەزاریان لە چینن.
