رووداو - تەندروستی
حکومەتی بەریتانیا بڕیاری داوە 2.4 ملیۆن پاوەند وەبەرهێنان بکات لەگەڵ زانکۆی ساوسهامپتن و کۆمپانیای بایۆتەکنەلۆژیی ئێسک جێنەڕا، تاوەکو ئەنجامی ئەو توێژینەوەیە سەر بگرێت کە لەسەر زوو دەستنیشانکردنی شێرپەنجە کراوە.
وەزیری تەندروستیی بەریتانیا چووەتە نێو تاقیگەکە و کارەکان دەبینێت، چونکە بەریتانیا پشگیریی تەواوەتی پڕۆژەکە دەکات.
ویس ستریتینگ، وەزیری تەندروستیی بەریتانیا دەڵێت: ''دەمانەوێت لەوە دڵنیابین کە بەریتانیا ببێتە پێشەنگی جیهان لە دۆزینەوەی پشکنین و چارەسەری نوێ، بۆ ئەوەی شێرپەنجە نەبێتە ئاماژەی مردن''.
توێژەرانی پەیمانگەی فرانسس کریک کار لەسەر بەرهەمهێنان و کاریگەریی رۆبۆتێکی ژیریی دەستکرد دەکەن تاوەکو نەشتەرگەریی لابردنی گرێی شێرپەنجەیی بکات.
د. نووها یاسیم، نەشتەرگەر دەڵێت: ''ئەمە پێناسەیەکی بەرزمان پێدەبەخشیت کە 10 ئەوەندە گەورەترە لە ئاستی ئاسایی و لە بری ئەوەی ئێمە کونێکی گەورە بکەین و دەستمان بەکاربهێنین، ئامێرە بچووکەکان بەکاردەهێنین کە لەنێو سکی نەخۆشەکە، هەمان جووڵەی دەستمان دەکەن و بە برینێکی بچووک و کەم''.
بەکارهێنانی ژیریی دەستکرد و تەکنەلۆژیا لە دەستنیشانکردن و چارەسەرکردنی شێرپەنجە ئومێدێکە بۆ ئەوانەی گرووپی مەترسیدارن یاخود ئەوانەی ترسیان لە نەخۆشییەکە هەیە، چونکە رێژەی چاکبوونەوە زیاد دەکەن.
