رووداو - تەندروستی
پسپۆڕێکی نەخۆشییەکانی خانمان و منداڵبوون رایدەگەیێنێت، خانمان بچنە بنکە تەندروستییەکان بۆ ئەوەی بەرنامەی کوتانیان بۆ بکرێتەوە، بەتایبەت دوای چوار مانگی دووگیانییان.
ئەمڕۆ شەممە 26-4-2025 د. سانا ئیسماعیل، پسپۆڕی نەخۆشییەکانی خانمان و منداڵبوون لە بووڵتەنی تەندروستیدا رایگەیاند، لە ماوەی دووگیانیدا سێ ڤاکسینی سەرەکی هەن کە پێویستە خانمان وەری بگرن، هەریکە لە ڤاکسینەکانی دژە 'گزاز، کۆکە رەشە و ئەنفلەوەنزا' لەم دواییانەش ڤاکسینی دژەکۆرۆناش زیادکرا بۆیان.
د. سانا ئیسماعیل دەڵێت: کوتان خانمانی دووگیان لە لێکەوتەکانی نەخۆشییەکان دەپارێزێت، بەمەش منداڵەکەی و خۆشیشی پارێزراو دەبن، چونکە ئەگەر ڤاکسین نەکرێن، ئەوا دەشێت خانمانی دووگیان بە هەڵامەتێکی ئاسایی دووچاری خەوتن لە نەخۆشخانە ببن.
هەفتەی جیهانی بۆ هۆشیاریی کوتانە و هەموو ساڵێک لە 24 تاوەکو 30ـی نیسان تەرخان کراوە بۆ هۆشیارکردنەوەی دایک و باوکان لە بایەخی کوتانی منداڵەکانیان بە ڤاکسین. پسپۆڕێکی منداڵان ئاشکرای دەکات، ڤاکسین منداڵ لە نەخۆشییە کوشندەکان دەپارێزێت و داواش لە دایک و باوکان دەکات وریای خشتەی پێدانی ڤاکسین بە منداڵەکانیان بن.
کوتان، منداڵانی کوردستان لەم نەخۆشییانە دەپارێزێت؛
- سوورێژە
- ئیفلیجیی مێشک
- دڕکە و مێکوتە
- گزاز
- هەوکردنی تووندی پەردەی مێشک
- ئەنفلەوەنزا
- ڤایرۆسی پاپیلۆما [شێرپەنجە]
- هەوکردنەکانی جگەر
- کۆکە رەشە
- ملەخڕێ
- ئاوڵە
- هەوکردنی تووندی سییەکان [نیومۆکۆکاڵ]
- ڤایرۆسی شینگڵ
- سیل
- کۆلێرا
