رووداو - تەندروستی
لە ئوسترالیا ژیریی دەستکرد بۆ زوو دەستنیشانکردنی شێرپەنجەی پێست تاقیدەکرێتەوە و ئامێرێکی لەیزەر بۆ دەستنیشانکردنی شێرپەنجەی پێست تێکەڵ بە ژیریی دەستکرد کراوە.
داهێنانەکە وا لە پزیشکان دەکات، زووتر شێرپەنجەی پێستی نەخۆشەکانیان دەستنیشان بکەن و بۆ یەکەمجارە ژیریی دەستکرد لە دەستنیشانکردنی شێرپەنجەی پێست بەکاردەهێندرێت.
ئامێرێکی لەیزەر بۆ برینەکانی پێست بەکاردەهێندرێت و ژیریی دەستکردیش ناڕێكییەکان لەڕێگەی شاشەیەکەوە پێشان دەدات، ژیرییە دەستکردەکە بە خێرایی و بە راستەوخۆ، بڕیار دەدات کە برینەکە شێرپەنجەییە یاخود نا و پزیشکەکەش هەموو خانەکان بە وردی دەبینێت.
د. ڤین راجیسوارا، بەڕێوەبەری کلینیکی نەخۆشییەکانی پێست دەڵێت: ''ئەوەی ئێستا هەمانە ئەوەیە، سەیری خانەکانی پێست دەکەین، ئەمەش گۆڕانکاریی گەورەی پزیشکی لە دەستنیشانکردنی شێرپەنجەی پێست دەکات''.
پڕۆفیسۆر د. پاسکاڵ گیتاریا، پسپۆڕی سەنتەری میلانۆما لە ئوسترالیا دەڵێت: ''پێموایە حکومەتێکی زۆر هەن کە بەدوای ئەم شتەدا دەگەڕێن، رەنگە ئەوکاتەی ئێمە دەیخەینە واری جێبەجێکردن، کۆپیان بکەن و بەکاریان بهێنن''.
بەگوێرەی پەیمانگەی شێرپەنجەکانی پێست لە ئوسترالیا، ئەم داهێنانە پێنج ساڵ دەخایەنێت تاوەکو بە فەرمی بۆ نەخۆشەکان بەکاربێت و ئیدی زووتر درک بەوە بکەن کە تووشی شێرپەنجەی پێست بوون و چارەسەریان ئاسان بێت.
.png&w=3840&q=75)
