رووداو دیجیتاڵ
بەپێی توێژینەوەیەکی نوێ، ئەو دایک و باوکانەی زۆر هەوڵ دەدەن منداڵەکانیان "هەمیشە" دڵخۆش و بەختەوەر بن و هەرگیز هەست بە دڵتەنگی و ناخۆشی نەکەن، لەوانەیە لەبری ئەوەی یارمەتییان بدەن، زیانێکی گەورەیان پێبگەیەنن.
توێژینەوەکە بە پشتبەستن بە قسەی دەروونناسانی ئیسپانی کراوە و لە ماڵپەڕی secom.esی ئیسپانی بڵاوکراوەتەوە.
کێشەکە چییە؟
1. فێرنەبوونی مامەڵەکردن لەگەڵ هەستی ناخۆش: ژیان تەنیا دڵخۆشی نییە. کاتێک منداڵێک رێگەی پێنادرێ هەست بە دڵتەنگی، تووڕەیی یان شکست بکات، کە گەورە دەبێت نازانێت چۆن مامەڵە لەگەڵ کێشەکانی ژیان بکات.
2. دروستبوونی کەسایەتیی خۆپەرست: ئەو منداڵەی هەمیشە هەموو شتێکی بۆ کراوە تاوەکو دڵخۆش بێت، وا فێر دەبێت کە گرنگترین شت لە دنیادا تەنها دڵخۆشیی خۆیەتی. ئەمەش وای لێدەکات کاتێک گەورە دەبێت، کەمتر بیر لە هەست و پێداویستیی کەسانی دیکە بکاتەوە و دەبێتە مرۆڤێکی خۆپەرست.
چارەسەر چییە؟
پسپۆڕان دەڵێن باشتر وایە دایکان و باوکان ئەم کارانە بکەن:
• رێگە بدەن منداڵ هەموو هەستێک تاقی بکاتەوە: با منداڵەکەت بزانێت کە دڵتەنگبوون و تووڕەبوون بەشێکن لە ژیان. لەبری ئەوەی خێرا هەوڵ بدەیت دڵخۆشی بکەیتەوە، قسەی لەگەڵ بکە و یارمەتی بدە تاوەکو لە هەستەکانی تێبگات.
• فێری بەهاکانی بکەن نەک تەنیا دڵخۆشی: لەبری ئەوەی هەمیشە پرسیاری ئەوەی لێبکەیت "ئایا دڵخۆشیت؟"، فێری بەهاکانی وەک میهرەبانی، هاوکاریکردنی خەڵک و بەرپرسیارێتی بکە.
• با فێری دانبەخۆداگرتن بێت: کاتێک منداڵێک شتێکی دەوێت و بۆی ناکڕیت، رەنگە بگری و دڵتەنگ بێت، بەڵام ئەمە فێری دەکات کە ناتوانێت هەمیشە هەرچیی ویست بۆی جێبەجێ بکرێت.
ئامانج ئەوە نییە منداڵێک پەروەردە بکەین کە هەرگیز دڵتەنگ نەبێت، بەڵکو ئەوەیە کەسێکی بەهێز و تێگەیشتوو بێت کە بتوانێت لە ژیانیدا رووبەڕووی هەموو دۆخێک ببێتەوە و رێز لە هەستی ئەوانی دیکەش بگرێت.
