رووداو دیجیتاڵ
هێلیکۆپتەرێکى سوپاى عێراق لە نزیک قەزاى خورماتوو کەوتە خوارەوە و ئەفسەرێکى فڕۆکەوان گیانی لەدەستدا و ئەفسەرێکى دیکەش بریندار بوو.
بەرەبەیانیی 19ـی کانوونى یەکەمى 2023، وەزارەتى بەرگریى عێراق لە راگەیێندراوێکدا ئاشکرایکرد کە هێلیکۆپتەرێکى سەر بە یەکەى ئاسمانى سوپا لە نزیک قەزاى خورماتوو لە پارێزگاى سەلاحەدین کەوتووەتە خوارەوە، بەهۆیەوە عەقیدێکى فڕۆکەوان بەناوى مەروان جەلال گیانى لەدەستداوە و نەقیبێکى فڕۆکەوان بەناوى عەلا سەلمان بریندار بووە و گوێزراوەتەوە بۆ نەخۆشخانەى خورماتوو.
بەگوێرەى راگەیێندراوەکەى وەزارەتى بەرگریى عێراق، ئەو هێلیکۆپتەرەی سوپاى عێراق بەهۆى کێشەى تەکنیکییەوە کەوتووەتە خوارەوە لە دواى ماوەیەکى کەم لە فڕینى لە فڕۆکەخانەى حلێوە.
