رووداو دیجیتاڵ
لە بەغدا ئاگرێکی گەورە لە کارگەیەکی ئیسفەنج کەوتەوە و بەرگریی شارستانیی عێراق دەڵێت، ئاگرەکەیان کۆنترۆڵکردووە.
نەواس سەباح شاکر، هاوئاهەنگیکارى راگەیاندنى بەڕێوەبەرایەتیى بەرگریى شارستانیی عێراق بە رووداوی گوت: "بەرەبەیانی ئەمڕۆ چوارشەممە تیمەکانمان ئاگرەکەیان کۆنترۆڵکرد. جگە لە زیانی مادی، زیانی گیانی نەبوو. لیژنەیەک هەڵسەنگاندن بۆ زیانەکەی دەکات".
سەبارەت بە هۆکاری رووداوەکە، نەواس سەباح شاکر گوتی، تاوەکو ئێستا بە فەرمی هۆکاری ئاگرەکە دیار نییە، بەڵام لێکۆڵینەوە دەستیپێکردووە و تیمەکانی بەڵگەی تاوان خەریکی لێکۆڵینەوەن.
ئاگرکەوتنەوەکە درەنگانی شەوی رابردوو بوو لە ناوچەی شوعلە لە باکووری رۆژئاوای بەغدا. ساڵی رابردوو لە عێراق زیاتر لە 20 هەزار رووداوی ئاگرکەوتنەوە تۆمارکراون.
