بەوێنە؛ دووەمین دیداری نەجەف - هەولێر

دیدارەکە لەلایەن ناوەندی لێکۆڵینەوەی رووداو بە هاوبەشیی ناوەندەکانی ''النبا، نارامسین و ریواق بەغداد'' بە ناونیشانی "زنجیرە دیالۆگی پێکهاتەکانی عێراق و هەرێمی کوردستان: دووەمین دیداری نەجەف – هەولێر" سازکرا.

زنجیرە دیالۆگەکە بە گوتاری ئاکۆ محەممەد، بەڕێوەبەری گشتیی تۆڕی میدیایی رووداو دەستیپێکرد کە تێیدا باسی لە چەندین پرس کرد، لەوانەش پێویستیی باشترکردنی پەیوەندییەکانی کورد و شیعە و گەڕاندنەوەی کەرکووک بۆ سەر هەرێمی کوردستان.

ئاکۆ محەممەد گوتی ''جێگەی دڵخۆشییە ناوەندی لێکۆڵینەوەی رووداو دەتوانێت ئەمڕۆ بۆ جاری دووەم لە ساڵی 2019ـوە ئەم دیالۆگە رێکبخات.''

بەڕێوەبەری گشتیی تۆڕی میدیایی رووداو دیدارەکەی بە گرنگ ناوبرد و گوتی، نەجەف "شوێنی رادەربڕینی زۆرلێکراوانە. ئەم کۆبوونەوەیەش کۆنگرەیەکی فەرمی نییە، بەڵکو کۆنگرە و کۆبوونەوەی دەستەبژێرێکی ئازادە کە هەموویان دەتوانن بەناوی خۆیانەوە نەوەک بە ناوی دەزگا و حیزبەکانیان بە ئازادی لەسەر پەیوەندی کورد و شیعە بئاخڤن.''

لە 2003ـوە شیعە بوونەتە دەسەڵاتداری یەکەمی عێراق و کوردیش تاوەکو ئێستا خۆی بە ستەملێکراو دەزانێت. 

یوسف گەناوی، پارێزگاری نەجەف لە دیدارەکەدا گوتارێکی پێشکێشکرد و گوتی، "دیدارەکە لە کاتێکی گرنگی عێراق و ناوچەکەدایە. هەردوولا بابەتی سەرەکی تاوتوێ دەکەن، کە کاریگەری بۆ سەر ئێستا و ئاییندەی هاوبەشمان دەبێت."  

یوسف گەناوی گوتی، "ئەمە هەر تەنیا دیدارێکی هزری نییە، بەڵکو دەرفەت و سەکۆیەکی گرنگی پەیوەندی و هاوکارییە بۆ داڕشتنی نەخشەی ئەو رێگەیەی وڵاتەکەمان لەسەری دەڕوات، بە لەبەرچاوگرتنی ئەو ئاڵنگارییە ئاڵۆزانەی رووبەڕووی هەموومان دەبنەوە." 

دیدارەکە بەشێکە لە پڕۆژەکانی تۆڕی میدیایی رووداو لەبارەی پێکهاتەکانی عێراق و هەرێمی کوردستان.

بەگوتەی پارێزگاری نەجەف، "سەقامگیریی پەیوەندی نێوان هەولێر و بەغدا پێویستی بە تێپەڕاندنی دابەشبوونە ناوخۆییەکان و بەهێزکردنی توانای دیالۆگ و لێکتێگەیشتنە."