رووداو دیجیتاڵ
گوتەبێژی حکومەتی عێراق دەڵێت، سوودانی دەستێوەردانی لە دیاریکردنی رۆژی جەژندا نەکردووە و کەسانێکی سیاسی هەن دەیانەوێت کار دەکەن بۆ راکێشانی دامەزراوە ئاینییەکان بۆ گۆڕەپانی ململانێ.
ئەمڕۆ دووشەممە، 31ـی ئادار، باسم عەوادی، گوتەبێژی حکومەتی عێراق بە میدیای فەرمیی عێراقی راگەیاند: "ئەو دەنگۆیانەی باس لە دەستێوەردانی محەممەد شیاع سوودانی دەکەن بۆ دیاریکردنی رۆژی جەژن، دوورن لە راستییەوە. بەداخەوە کەسانێکی سیاسی هەن کار دەکەن بۆ راکێشانی دامەزراوە ئاینییەکان، بۆ گۆڕەپانی ململانێ لەسەر هەژموون و پلە و پۆستەکان."
بە گوتەی عەوادی، سەرۆکوەزیران باوەڕی تەواوی بە دامەزراوە ئایینییەکان هەیە و کاردەکات بۆ پێدانی ماف و پانتایی مافی بڕیاردانی تایبەت بە خۆیان، خۆیشی لەو بابەتانە بە دوور دەگرێت، "چونکە ئەو کاروبارانە لە دەسەڵاتی مەرجەع و دامەزراوە شەرعییەکاندایە."
گوتەبێژی حکومەتی عێراق دەڵێت: "سەرۆکوەزیران جەخت لە رێزگرتن لە هەموو بۆچوونەکان دەکاتەوە، لە چوارچێوەی هەموو بیروباوەڕەکانی گەلی عێراقدا."
ناکۆکی لەسەر دیاریکردنی جەژنی رەمەزانی ئەم ساڵ، تەنیا لە نێوان شیعە و سوننە مەزهەبەکان نەبوو، بەڵکو لە نێو خودی مەزهەبی سوننەشدا هەمان ناکۆکی دروست بوو.
رۆژی 29ـی ئەم مانگە، لیژنەی بینینی مانگ لە سعودیە، ئیمارات و قەتەر، 30ـی ئاداریان کرد بە یەکەم رۆژی جەژنی رەمەزان، بەڵام سووریا و میسر و چەندین وڵاتی دیکەی سوننە مەزهەب ئەمڕۆ دووشەممەیان وەک یەکەم رۆژی جەژن دیاری کرد.
دیوانی وەقفی سوننی عێراقیش لە یەکەم راگەیێندراویدا لە رۆژی 29ـی مانگ، رۆژی 30ـی ئاداری وەک یەکەم رۆژی جەژن دیاری کرد، بەڵام دواتر رایگەیاند، بەگوێرەی پێوەرە شەرعییەکان، 31ـی مانگ یەکەم رۆژی جەژنی رەمەزانە.
بەڵام هەریەکە لە دەستەی فەتوای عێراق و دەستەی زانایانی ئیسلامی لە عێراق کە دوو دامەزراوەی نافەرمیی سوننین، رۆژی 30ـی ئاداریان وەکو یەکەم رۆژی جەژن دیاری کرد. ئەو ناکۆکییانەش لە دیاریکردنی رۆژەکەدا کاردانەوەی جیاوازی لێکەوتەوە.
