رووداو دیجیتاڵ
ئەمینداری گشتیی عەسائیبی ئەهلی حەق هۆشداری دەدات و دەڵێت، نابێت عێراق وەک تەماشاکەری رووداوەکانی سووریا بمێنێتەوە، چونکە ئەو رووداوانە هەڕەشەیەکی راستەوخۆ و مەترسیدارن بۆ سەر ئاسایشی نەتەوەیی عێراق.
رۆژی دووشەممە 3103-2025 قەیس خەزعەلی، ئەمینداری گشتیی عەسائیبی ئەهلی حەق لە کاتی پێشکێشکردنی گوتاری جەژندا لە نەجەف رایگەیاند: "ئەو رووداوانەی ئەم ساڵ روویاندا بەڕاستی قورس بوون، غەززەش سەردەبڕدرێت و کەسیش ناجوڵێت لە بەرامبەر ئەو تاوانەدا جگە لە بەرەی مقاوەمە. جیهانی ئیسلامی راوەستاوە و تەماشا دەکات، هیچیش ناکەن لە بەرامبەر ئەو کۆمەڵکوژییەی بەسەر غەززەدا دەهێنرێت."
قەیس خەزعەلی هۆشداری لە دابەشبوونی سووریا د و گوتی: "پاڵنەرە ئایدیۆلۆژییەکان تەنیا لە فەلەستین و لوبناندا سنووردار نین، بەڵکو تەماحی زایۆنی کۆنترۆڵکردنی ناوچەکەیە. یەکێک لە ئەرکەکانی وڵاتانی عەرەبی جێبەجێکردنی پڕۆژەی زایۆنیستییە بۆ دابەشکردنی سووریا، هەوڵی دروستکردنی هەرێمێکی نوێ لە سووریا دەدرێت، بە ئامانجی دابەشکردنی وڵاتەکە."
ئەمینداری گشتیی عەسائیبی ئەهلی حەق، رووداوەکانی سووریا بە هەڕەشە لەسەر ئاسایشی عێراق دەزانێت، بۆیە دەڵێت: "عێراق ناتوانێت وەک تەماشاکەری رووداوەکانی سووریا بمێنێتەوە."
بە گوتەی قەیس خەزعەلی، "دەوڵەتی عێراق دەبێت چالاکتر و چاوکراوەتر بێت لەو رووداوانەی لە سووریا روودەدەن، عێراقیش دەتوانێت ئەو پڕۆژەیە پووچەڵ بکاتەوە بۆ دابەشکردنی سووریا کە قەوارەی زایۆنی و ئەمریکا و یەکێک لە وڵاتانی عەرەبی دەیانەوێت."
ئەمینداری گشتیی عەسائیبی ئەهلی حەق هۆشداری دەدات لەوەی، "لاتان سەیر نەبێت ئەگەر عێراق راپێچی نێو گۆڕەپانی شەڕی بیروباوەڕ کرا، چونکە دوژمن عێراقی لە دەرەوەی بازنەی رووداوەکانی ئێستا دانەناوە."
قەیس خەزعەلی، تورکیاش بە هەڕەشە بۆ سەر عێراق دەزانێت و دەڵێت: "یەکێکی دیکە لە مەترسییەکانی سەر یەکڕیزی و سەقامگیری عێراق، تورکیایە."
