رووداو دیجیتاڵ
بریکارێکى وەزارەتى نەوتى عێراق رایگەیاند، گرێبەستەکەى بى پى بۆ ماوەى 25 ساڵە و بەرهەمهێنانى نەوتى کەرکووک دەگەیێنێتە 420 هەزار بەرمیل لە رۆژێکدا.
باسم محەممەد خزەیر، بریکارى وەزارەتى نەوتى عێراق بۆ کاروبارى دەرهێنان رایگەیاند: بەگوێرەى گرێبەستى وەزارەتەکەى لەگەڵ کۆمپانیاى بریتش پترۆلیۆم (بى پى) بەرهەمهێنانى نەوت لە چوار کێڵگەى کەرکووک بەرز دەکاتەوە بۆ 420 هەزار بەرمیلى رۆژانە، لەکاتێکدا ئێستا رۆژانە 308 هەزار بەرمیل نەوت بەرهەمدەهێنێت.
گرێبەستى کۆتایی وەزارەتى نەوتى عێراق لەگەڵ کۆمپانیاى بى پى لە 26ى ئادارى 2025 لە بەغدا واژۆ کرا.
باسم محەممەد خزەیر بە میدیاى فەرمى عێراقى راگەیاند: ماوەى گرێبەستەکە 25 ساڵە، لەگەڵ ئەگەرى درێژکردنەوەى بۆ ماوەى پێنج ساڵى دیکە.
بە گوێرەى گرێبەستەکە، کۆمپانیاى بى پى لە کێڵگەکانى بابا گوڕگوڕ، باى حەسەن، خەباز و جەمبوور کاردەکات، بەشێکى بۆ بەرهەمهێنانى نەوت و ئەوى دیکەی بۆ وەبەرهێنانى گازى هاوەڵى ئەو کێڵگانەیە.
بریکارەکەى وەزارەتى نەوتى عێراق ئاماژەى بەوەدا، کە بەشێکى دیکەى گرێبەستەکە بۆ 16 ساڵە بۆ وەبەرهێنانى گازى هاوەڵى کێڵگەکانى نەوت لە کەرکووک، بەبڕى 400 ملیۆن پێ سێجا لە رۆژێکدا، جگە لەوە کۆمپانیاکە کار لەسەر فراوانکردنى دەمەزراوەکانى سەر بە کۆمپانیاى گازى باکوور دەکات.
رۆژی 1ی ئابی 2024 محەممەد شیاع سوودانی، سەرۆکوەزیرانی عێراق، سەرپەرشتیی رێوڕەسمی واژۆکردنی یاداشتێکی لێکتێگەیشتنی نەوتی گشتگیری لەنێوان وەزارەتی نەوت و کۆمپانیای نەوتی BP کرد، بۆ پەرەپێدانی کێڵگەکانی بەرهەمهێنانی نەوت و گازی کەرکووک.
باسم محەممەد خزەیر رایگەیاند: بەگوێرەى گرێبەستەکە، دەکرێت دانوستاندنى دیکە لەگەڵ کۆمپانیاى بى پى، لەبارەى کنە و پشکنین لە چەند ناوچەیەکى دیکە لە نێوان چوار کێڵگە نەوتییەکەى کەرکووک بکرێت.
بە گوتەى ئەو بەرپرسەى وەزارەتى نەوت یەکێک لە خاڵەکانى دیکەى گرێبەستەکە، دانانى وێستگەیەکى کارەبایە بە تواناى بەرهەمهێنانى 400 مێگاوات.
