رووداو دیجیتاڵ
لە ئەنبار فڕۆکەیەکی بێفڕۆکەوان بە لیوایەکی حەشدی خێڵەکی دا تەقییەوە و برینداربوونی چەکدارانی حەشدی لێکەوتەوە.
ئەمڕۆ چوارشەممە، 23ـی نیسان، عەبدوڵڵا جغێفی، راوێژکاری فالح فەییاز، سەرۆکی دەستەی حەشدی شەعبی بۆ کاروباری ئەنبار بە تۆڕی میدیایی رووداوی راگەیاند، "ئەمڕۆ لە رۆژئاوای بیابانی ئەنبار، فڕۆکەیەکی بێفڕۆکەوانی بۆمبڕێژکراو کە پاشماوەی جەنگی بوو، لە کاتی گواستنەوەی بۆ پووچەڵکردنەوەی لەلایەن لیوای 54ی حەشدی خێڵەکی، تەقییەوە و بەهۆیەوە فەرماندەیەکی هەواڵگریی حەشد بریندار بوو."
بەڵام سەعد غازی، سەرۆکی لیژنەی ئەمنیی پارێزگای ئەنبار بە رووداوی گوت، "ئەو فڕۆکە بێفڕۆکەوانە خۆی کەوتبووە خوارەوە و چەکدارانی حەشدی خێڵەکی تەقەیان لێکردووە و تەقاندوویانەتەوە، هێشتا دیاریش نییە لەکوێوە ئاراستەکراوە."
رووداوەکە لە ناوچەی رەزازە روویداوە، کە دەکەوێتە سنووری نێوان ئەنبار و کەربەلا.
وەک سەعد غازی دەڵێت، بەگوێرەی ئەوەی باس دەکرێت، 4 بۆ 5 چەکداری حەشدی خێڵەکی بەهۆی تەقینەوەی درۆنەکە برینداربوون، "بەڵام هێشتا پشتڕاست نەکراوەتەوە."
