رووداو دیجیتاڵ
وەزیری گواستنەوەی عێراق رایگەیاند، رێککەوتنی گواستنەوەی وشکانیی نێودەوڵەتی ناسراو بە ترانزێت (TIR)، دوای زیاتر لە 40 ساڵ لە عێراق جێبەجێ دەکرێت، هەرێمی کوردستانیش دەگرێتەوە و لەوێشەوە دەستپێدەکات.
رێککەوتننامەی گواستنەوەی وشکانیی نێودەوڵەتی (Transports Internationaux Routiers) لە ساڵی 1975 واژۆ کرا، لە 20ی ئاداری 1978 کارا کرا، نزیکەی 78 وڵات لە جیهان واژۆی لەسەر کردووە. یەکەمجارە عێراق دەچێتە نێو رێککەوتننامەکە.
رەزاق محێبس سەعداوی، وەزیری گواستنەوەی عێراق لە لێدوانێکدا بۆ دەزگاکانی راگەیاندن، رۆژی سێشەممە 3ی حوزەیرانی 2025 گوتی، چوونی عێراق بۆ نێو رێککەوتنەکە "رووداوێکی مێژوویی و پەیامێکی گرنگە" بۆ جیهان، کە عێراق وڵاتێکی ئارام و سەقامگیرە و کراوەیە بەڕووی بازرگانیی نێودەوڵەتیدا.
وەزیری گواستنەوەی عێراق ئاماژەی بەوەش کرد، رێککەوتنی 'تیر' پێشەکییەکە بۆ سەرکەوتنی پڕۆژەی ستراتیژیی رێگەی گەشەپێدان و گواستنەوەیەکی ئارام و ئاسان بۆ بازرگانیی نێوان وڵاتان دابین دەکات، بانگهێشتێکی کراوەیە بۆ وەبەرهێنەران و کەرتی تایبەت تاوەکو بە هێزەوە بێنە ناو بازاڕی عێراق."
لە وەڵامی پرسیاری پەیامنێری رووداو، سەبارەت بەوەی ئایا رێککەوتنەکە هەرێمی کوردستانیش دەگرێتەوە، وەزیری گواستنەوەی عێراق گوتی، "بەڵێ، سەرەتاکەی لە هەرێمی کوردستانەوەیە."
سەعداوی ئاماژەی بەوەش کرد، "ئەم دەستکەوتە ئاسانکاریی گەورە بۆ بازرگانان و وەبەرهێنەران لە سەرتاسەری عێراق، بە هەرێمی کوردستانیشەوە، دابین دەکات."
چاوەڕوان دەکرێت جێبەجێکردنی سیستمی "تیر" ببێتە هۆی کەمکردنەوەی ماوەی گواستنەوە بە رێژەی نزیکەی 80% و کەمکردنەوەی تێچوو بە نزیکەی 38%، سەرەڕای دابینکردنی هەزاران هەلی کار.
.jpeg&w=3840&q=75)