رووداو دیجیتاڵ
ئەنجوومەنی باڵای دادوەریی عێراق هۆشداری دەداتە بەربژێرانی هەڵبژاردنی ئەنجوومەنی نوێنەرانی عێراق و دەڵێت، بە وردی چاودێرییان دەکات و هەر بەربژێرێک هانی دووبەرەکی بدات، رەنگە لە بەشداریکردن لە هەڵبژاردن دووربخرێتەوە.
رۆژی چوارشەممە 13-8-2025 ئەنجوومەنی باڵای دادوەریی عێراق راگەیێندراوێکی بڵاوکردەوە و رایگەیاند، "لەگەڵ نزیکبوونەوەی وادەی هەڵبژاردنی ئەنجوومەنی نوێنەران، لەم دواییانەدا تێبینی کراوە هەندێک بەربژێر لە چالاکی و کۆبوونەوەکانی بانگەشەی هەڵبژاردندا، زمانێک بەکاردەهێنن کە لە رووی یاساییەوە قبووڵکراو نییە و ناکۆکی لەنێوان رۆڵەکانی یەک وڵاتدا بڵاودەکاتەوە، یان بەدەر لە چوارچێوەی رکابەریی هەڵبژاردن، سووکایەتی بە بەربژێرەکانی دیکە دەکەن، جا چ بە ئەنقەست بێت یان بەبێ مەبەست".
ئەنجوومەنەکە هۆشداری داوەتە ئەو بەربژێرانە و رایگەیاندووە: "ئەم رەفتارانە پێچەوانەی دەستوور و یاسا و رێنماییە کارپێکراوەکانن، ئاماژەیە بۆ ئەگەری بێبەشکردنیان لە بەشداریکردن لە هەڵبژاردن بەپێی یاسا".
ئەنجوومەنی باڵای دادوەری داوا لە هەموو بەربژێرەکان دەکات، چ وەک کەس یان پارت، خۆیان لەو گوتار و لێدوانانە بەدوور بگرن و رایگەیاندووە: "بەوردی چاودێری دەکرێن و رێکاری یاسایی بەرامبەر هەر کەسێک دەگیرێتەبەر، کە لێی دەربچێت".
موهەنەد سەڕاج، ئەندامى تیمى رۆژنامەڤانى کۆمیسیۆنى باڵاى سەربەخۆى هەڵبژاردنەکانى عێراق بەتۆڕى میدیایی رووداوى گوت:" تیمى تایبەتمان هەیە بۆ تۆمارکردنى پێشێلکارییەکان کە سزاکەى دەگاتە ئاستى بێبەشکردنى بەربژێر لە بەشدارى هەڵبژاردن".
هەرچەندە بانگەشەی هەڵبژاردن بە فەرمی دەستیپێنەکردووە، بەڵام بەشێک لە بەربژێرەکان لە رێگەی سۆشیاڵمیدیا بە راستەوخۆ و ناڕاستەوخۆ هێرش دەکەنە سەر یەکدی.
بڕیارە 11-11-2025 هەڵبژاردنی پەرلەمانی عێراق بکرێت، بۆ 329 کورسییەکەی پەرلەمان 854 کەس خۆیان بەربژێر کردووە، کە 76یان بەربژێری تاک و سەربەخۆن.
