رووداو دیجیتاڵ
کۆمیسیۆنى باڵاى سەربەخۆى هەڵبژاردنەکانى عێراق دوو بەربژێرى هەڵبژاردنى پەرلەمانى عێراقى سزا دا و دەبێت یەکێکیان 5 ملیۆن دینار و ئەوى دیکەشیان دوو ملیۆن دینار پێبژاردن بدات، ئەوەش بەهۆى دەستپێکردنى بانگەشەى پێشوەخت بۆ ئەو هەڵبژاردنە.
بەگوێرەى بڕیارى ئەنجوومەنى کۆمیسیارانی کۆمیسیۆنى باڵاى سەربەخۆى هەڵبژاردنەکانى عێراق کە 31ى ئابى 2025 دەریکردووە، بڕیاری داوە بە سزادانى عەلى ئەنهیر ئەبو زینە، بەربژێرى هاوپەیمانیى ئاوەدانکردنەوە و گەشەپێدان لە سنوورى پارێزگاى بەغدا کە لەلایەن محەممەد شیاع سوودانى، سەرۆکوەزیرانى عێراقەوە سەرکردایەتى دەکرێ و سزاکە پێبژاردنە بە بڕى پێنج ملیۆن دینار.
سزادانى ئەو بەربژێرە بەگوێرەى بڕگەى دوو لە مادەى دووى رێنوێنییەکانى بانگەشەى هەڵبژاردنە کە تایبەتە بە سەرپێچیکردن لە دەستپێکردنى بانگەشە بەر لە وادەی خۆی یان لە دواى راگرتنى بانگەشە.
ئەنجوومەنى کۆمیسیاران لە بڕیارێکى دیکەدا سزای ئوسامە جبوورى، بەربژێرى لیستى هاوپەیمانیى خزمەتی لە سنوورى پارێزگاى نەجەف دا بە دوو ملیۆن دینارى پێبژاردن، بەهۆى سەرپێچیکردنى رێنماییەکانى تایبەت بە بانگەشەى هەڵبژاردن و دەستپێکردنى بەر لە ماوەى دیاریکراو.
هێشتا کۆمیسیۆنى باڵاى سەربەخۆى هەڵبژاردنەکان رۆژى دەستپێکردن و کۆتاییهاتنى بانگەشەى هەڵبژاردنى بۆ پەرلەمانى عێراق رانەگەیاندووە کە دەکەوێتە قۆناخى دواى پەسندکردنى ناوى بەربژێرەکان.
نزیکەی 8000 کەس خۆیان بۆ هەڵبژاردنی پەرلەمانی عێراق بەربژێرکردبوو، بەڵام زیاتر لە 600 بەربژێریان گۆڕدراون یان بە هۆکاری جیا جیا دوورخراونەتەوە.
ئەو هەڵبژاردنە لە 11ی تشرینی دووەمی ئەم ساڵ دەکرێ. هەر پارێزگایەکی عێراق و هەرێمی کوردستان بازنەیەکی هەڵبژاردنە.
