سەرۆککۆماری عێراق: هەڕەشەی داعش لەسەر وڵاتەکەمان نەماوە

سەبارەت بە هەڕەشەی داعش لەسەر وڵاتەکە؛ لەتیف رەشید، سەرۆککۆماری عێراق گوتی، "ئێستا لە عێراقدا هیچ [هەڕەشەیەک نەماوە]. ئەوان (چەکدارانی داعش) لە زۆر شوێن لەنێوبراون، بەڵام هێشتا پێویستە ئاگاداربین بۆ چاودێریکردنی جووڵەی داعش، چونکە داعش تەنیا لە عێراق نییە. ئەوان (چەکدارانی داعش) بە نزیکەیی لە هەموو شوێنێکن."

سەرۆککۆماری عێراق ئاماژەی بەوەش کرد، "یەکێک لە ئەرکەکانمان، لە هاتنمان بۆ نەتەوە یەکگرتووەکان، ئەوەیە داوا لە حکومەتەکان بکەین داعشەکان ببەنەوە وڵاتانی خۆیان."

لەبارەی کشانەوەی هێزەکانی ئەمریکا، سەرۆککۆماری عێراق رایگەیاند، بڕیارەکە لە دەستی تاکە کەسێکدا نییە، "ئەمە بە حکومەتی عێراق سپێردراوە بۆئەوەی لەگەڵ ئەمریکا بگاتە رێککەوتن. چەندیان دەمێننەوە، چەندیان دەتوانن بڕۆن و کەی بە تەواوی عێراق جێدەهێڵن (لەسەر حکومەتی عێراقە). بۆیە ئەمە بەندە بە دانوستاندن یان گفتوگۆ لەنێوان ئەمریکا و حکومەتی عێراق."

لەتیف رەشید گوتی، لە پەراوێزی کۆبوونەوەکانی نەتەوە یەکگرتووەکان بە کورتی لەگەڵ دۆناڵد ترەمپ قسەی کردووە. لە وەڵامی ئەوەی کە کۆشکی سپی رایگەیاندووە، هاوبەشە بیانییەکان پێیان وایە ترەمپ تاکە کەسە کە دەتوانێ جەنگی غەززە رابگرێت، لەتیف رەشید گوتی، "منیش هاوڕام. کارەساتی غەززە و دۆزی فەڵەستین چەندین ساڵە بەردەوامن. پێم وایە ئەمریکا ئێستا بەهێزترین زلهێزی جیهانە، دڵنیام دەتوانێ کاریگەری لەسەر حکومەتی ئیسرائیل هەبێ بۆ کۆتاییهێنان بەم جەنگە."

سەرۆککۆماری عێراق چارەسەری کێشەکەی بە "دامەزراندنی دوو دەوڵەت بۆ ئیسرائیل و فەڵەستین" و جێبەجێکردنی بڕیارەکانی نەتەوە یەکگرتووەکان و بڕیاری ئەم دواییەی وڵاتانی ئەورووپا ناوبرد و گوتی، "پێویستە جەنگ رابگیرێ پێش ئەوەی بتوانین دەست بە داڕشتنی نەخشەڕێگەیەک بۆ چارەسەری کۆتایی بکەین."

لە وەڵامی پرسیارێکدا سەبارەت بەوەی ئایا عێراق ئامادەیە هاووڵاتییانی غەززە وەربگرێت، لەتیف رەشید گوتی: "پێم وانییە هیچ کەس پەنابەرانی غەززە وەربگرێت، بۆچی ناچاریان دەکەی خاکەکەیان جێبهێڵن و ببنە پەنابەر؟ ئایا دەتوانی هیچ گەلێک ناچار بکەی وڵاتی خۆیان جێبهێڵێت؟"

بەڵام سەرۆککۆمار گوتی، "ئەگەر تاکێک یان خێزانێک بیەوێت لە شوێنێکی دیکە بژی، بەڵێ، ئێمە دڵخۆش دەبین یارمەتی بدەین. بەڵام نەوەک سەپاندنی دۆخی پەنابەری بەسەر گەلی فەڵەستیندا."

ئەم قسانەی سەرۆککۆماری عێراق لەگەڵ کەناڵی سی بی ئێسی ئەمریکی بوو لە نیویۆرک.