رووداو دیجیتاڵ
هێزە ئەمنییەکان لە موسڵ دوو کەسیان لە دوو ناوچەی رۆژهەڵاتی شارەکە دەستگیرکرد، کە پۆستەری بەربژێرەکانیان دەدڕاند و ئەو پایە ئاسنانەیان دەدزی کە بۆ بانگەشەی هەڵبژاردن بەکاردەهێندران.
شێخ ئەحمەد عەبد رەبە، جێگری سەرۆکی لیژنەی ئاسایش و بەرگری لە ئەنجوومەنی پارێزگای نەینەوا، رۆژی شەممە 11-10-2025 بە تۆڕی میدیایی رووداوی راگەیاند، ئەو کەسانەی ئەو کارانە دەکەن "دەروون نەخۆشن" و پێویستە رێکاری یاساییان بەرامبەر بگیرێتەبەر. گوتیشی: "دەبێت روویەکی جوانی شارستانی پێشان بدەین و ئەو کارانەش رەفتاری تاکەکەسین."
فەرحان مەعمووری، بەرپرسی ئۆفیسی نەینەوای کۆمیسیۆنی باڵای سەربەخۆی هەڵبژاردنەکانی عێراق، رۆژی شەممە، 11-10-2025، بە تۆڕی میدیایی رووداوی راگەیاند، "گوێبیستی هەواڵی لەو شێوەیە بووین، بەڵام تاوەکو ئێستا بە فەرمی هیچ بەربژێر و لایەنێک لەسەر ئەو کارە سکاڵایان لە کۆمیسیۆن تۆمار نەکردووە."
لەوەتەی بانگەشەی هەڵبژاردن لە 3ی تشرینی یەکەمەوە دەستیپێکردووە، دیاردەی دڕاندنی پۆستەری بەربژێرەکان و رێکلامی لیستەکان لە چەند پارێزگایەک زیادیکردووە. ئەمەش کۆمیسیۆنی باڵای سەربەخۆی هەڵبژاردنەکانی ناچار کردووە هۆشداریی تووند بداتە بەربژێر و لایەنە سیاسییەکان و جەخت لەوە بکاتەوە کە تەواوی هەڵمەتەکە لەژێر چاودێریی توونددا دەبێت.
فەرحان مەعمووری جەختی لەوەشکردەوە کە هێرشکردنە سەر پۆستەری بەربژێرەکان پێشێلکارییەکی ئاشکرایە و سزای یاسایی لەسەرە، داواشی لە هاووڵاتیان کرد هاوکاریی دەزگا ئەمنییەکان بکەن و لەکاتی بینینی هەر کارێکی تێکدەرانە، دەزگاکان ئاگادار بکەنەوە.
.jpg&w=3840&q=75)
