رووداو دیجیتاڵ
بانکی ناوەندیی عێراق دەڵێ، قەرزی گشتی 43% تێناپەڕێ و ئەو رێژەیەش لە سنووری سەلامەتی و ستانداردە نێودەوڵەتییەکاندایە.
بانکی ناوەندیی عێراق لە راگەیێندراوێکدا بڵاویکردەوە، کورتهێنانی پلاندانراو لە یاسای بودجەی گشتیی سێ ساڵە (2023، 2024، 2025) کە پەرلەمان پەسندی کرد، گەیشتە 91.5 تریلیۆن دینار، بەڵام کورتهێنانی راستەقینەی ئەم سێ ساڵە تەنیا 35 تریلیۆن دینارە کە لە نێوخۆ و لە رێگەی قەواڵە و حەواڵەوە دابین کراوە.
بانکەکە دەڵێ: "قەرزکردنی راستەقینە تەنیا 18.2%ی کورتهێنانی پلاندانراوی یاسای بودجەی پێکهێناوە، ئەوەش رەنگدانەوەی هاوئاهەنگییەکی باڵای نێوان حکومەت و بانکی ناوەندییە لە کۆنترۆڵکردنی قەرزە گشتییەکان و نەهێشتنی گەیشتنی بەو ئاستە بەرزەی لە یاسای بودجەدا هاتووە."
بانکی ناوەندیی عێراق ئاماژە بەوە دەکات کە "ئەو قەرزە دەرەکییەی پێویستە بدرێتەوە لە 13 ملیار دۆلار تێناپەڕێ، دوای دەرکردنی قەرزەکانی رژێمی پێشوو کە هەڵپەسێردراون و داواکارییان لەسەر نییە. عێراقیش لە دانەوەی هیچ پابەندییەک دوانەکەوتووە و ناوبانگێکی دارایی نایابی لەسەر ئاستی ناوچەیی و نێودەوڵەتی پاراستووە."
سەبارەت بە قەرزی نێوخۆیی کە 91 تریلیۆن دینارە، بانکەکە دەڵێ، 56 تریلیۆن دیناری قەرزی کەڵەکەبووی کۆتایی ساڵی 2022ـە و 35 تریلیۆن دینارەکەی دیکە قەرزی ساڵانی (2023، 2024، 2025)ـە کە زۆربەی ئەم قەرزە نێوخۆییەش لە چوارچێوەی سیستمی بانکیی حکومیدایە.
بانکی ناوەندیی عێراق باسی لەوەش کردووە، لیژنە تایبەتمەندەکان و کۆمپانیا راوێژکارییە نێودەوڵەتییەکان کار لەسەر گۆڕینی بەشێک لەو قەرزانە دەکەن بۆ ئامرازی وەبەرهێنان لە چوارچێوەی سندووقێکی نیشتمانی بۆ بەڕێوەبردنی قەرزی نێوخۆیی، بە ئامانجی گۆڕینی پابەندییەکان بۆ دەرفەتی وەبەرهێنان.
لە راگەیێندراوەکەدا هاتووە، بانکی ناوەندیی عێراق کار لەسەر پێشکێشکردنی دیدگەیەکی گشتگیر دەکات سەبارەت بە بەردەوامیی دارایی بۆ ساڵانی داهاتوو کە پشتگیریی ئاراستەکانی حکومەت دەکات لە چاکسازیی گشتگیر بۆ هەمەجۆرکردنی ئابووری و بەرزکردنەوەی داهاتی نانەوتی.
