رووداو دیجیتاڵ
جێگری گوتەبێژی سکرتێری گشتیی نەتەوە یەکگرتووەکان رایگەیاند، مۆڵەتی چاودێریکردنی هەڵبژاردنەکانی ئەنجوومەنی نوێنەرانی عێراقیان نییە، بەڵام هاوکاریی تەکنیکیی بەهێز پێشکێشی کۆمیسیۆنی باڵای سەربەخۆی هەڵبژاردنەکان دەکەن.
فەرحان حەق، جێگری گوتەبێژی سکرتێری گشتیی نەتەوە یەکگرتووەکان، لە وەڵامی پرسیارێکی رووداودا سەبارەت بە رۆڵی رێکخراوەکەیان لە هەڵبژاردنەکانی عێراقدا رایگەیاند: "نەتەوە یەکگرتووەکان مۆڵەتی چاودێریکردنی هەڵبژاردنەکانی عێراقی نییە."
جێگری گوتەبێژی سکرتێری گشتیی نەتەوە یەکگرتووەکان روونیکردەوە، ئەوان رۆڵێکی گرنگی تەکنیکییان هەیە و گوتی: "ئێمە هاوکاریی تەکنیکیی بەهێزی هەڵبژاردن پێشکێش بە کۆمیسیۆنی باڵای سەربەخۆی هەڵبژاردنەکانی عێراق دەکەین لەسەر پڕۆسەی هەڵبژاردن، ئەمەش کاری ئێمە بووە بۆ 17 هەڵبژاردنی پێشوو لە ساڵی 2004ـەوە."
جێگری گوتەبێژی سکرتێری گشتیی نەتەوە یەکگرتووەکان جەختی کردەوە کە "نەتەوە یەکگرتووەکان هاوکاریی تەکنیکی پێشکێش دەکات بۆ پشتگیریکردنی هەوڵەکانی کۆمیسیۆنی باڵای سەربەخۆی هەڵبژاردنەکان بۆ پەرەپێدانی شەفافیەت، گشتگیری و متمانە لە پڕۆسەی هەڵبژاردندا."
سەبارەت بە بەشداریکردنی گرووپە چەکدارەکان لە هەڵبژاردنەکان و کاریگەرییان لەسەر پاکی و بێگەردیی پرۆسەکە، فەرحان حەق گوتی: "تۆمارکردنی پارتە سیاسییەکان و هاوپەیمانێتییەکان بۆ هەڵبژاردنەکانی عێراق پڕۆسەیەکی نیشتمانییە و لەلایەن کۆمیسیۆنی باڵای سەربەخۆی هەڵبژاردنەکانەوە بەپێی یاسا و رێساکانی عێراق بەڕێوەدەچێت."
بڕیارە رۆژی 11-11-2025 هەڵبژاردنی پەرلەمانی عێراق بەڕێوەبچێت، نزیکەی 20 گرووپی چەکدار هەندێکیان بە ئاشکرا و بە لیستی خۆیان یان لە چوارچێوەی لیستەکانی دیکە بەشداری هەڵبژاردنەکە دەکەن.
دەقی پرسیاری رووداو و وەڵامی فەرحان حەق:
رووداو: هەڵبژاردنەکانی عێراق، کە بڕیارە نزیکەی هەفتەیەکى دیکە بەڕێوەبچن، ئایا نەتەوە یەکگرتووەکان هیچ رۆڵێک لەو هەڵبژاردنانەدا دەگێڕێت؟ هەروەها، ئایا ئاگاداری بەشداریکردنی گرووپە چەکدارەکانن لەم هەڵبژاردنەدا؟ ئایا نابنە هەڕەشە بۆ سەر پاکی و بێگەردی دەنگدانەکە؟
فەرحان حەق: لەبارەی پرسیارەکەت دەربارەی چاودێریکردنی هەڵبژاردنەکانی عێراق، پێتان دەڵێم کە نەتەوە یەکگرتووەکان مۆڵەتی چاودێریکردنی هەڵبژاردنە پەرلەمانییەکانی عێراقی نییە. ئێمە هاوکاری تەکنیکی بەهێزی هەڵبژاردن پێشکەش بە کۆمیسیۆنی باڵای سەربەخۆی هەڵبژاردنەکانی عێراق دەکەین لەسەر پڕۆسەی هەڵبژاردن، کە ئەمەش کاری ئێمە بووە بۆ 17 هەڵبژاردنی پێشوو لە ساڵی 2004ـەوە. سەبارەت بە تۆمارکردنی گرووپە چەکدارییەکان، دەتوانم بڵێم کە تۆمارکردنی پارتە سیاسییەکان و هاوپەیمانێتییەکان بۆ هەڵبژاردنەکانی عێراق پڕۆسەیەکی نیشتمانییە و لەلایەن کۆمیسیۆنی باڵای سەربەخۆی هەڵبژاردنەکانەوە بەپێی یاسا و رێساکانی عێراق بەڕێوەدەبرێت. نەتەوە یەکگرتووەکان هاوکاری تەکنیکی پێشکەش دەکات بۆ پشتگیریکردنی هەوڵەکانی کۆمیسیۆنی باڵای سەربەخۆی هەڵبژاردنەکان بۆ پەرەپێدانی شەفافیەت، گشتگیری و متمانە لە پڕۆسەی هەڵبژاردندا.
