روواو دیجیتاڵ
سەرۆکوەزیرانی عێراق بڕیاری راگرتنی هاوردەکردنی بەنزین، گازوایل و نەوتی دەرکرد.
ئەمڕۆ سێشەممە، نووسینگەی راگەیاندنی محەممەد شیاع سوودانی، سەرۆکوەزیرانی عێراق لە راگەیێندراوێکدا رایگەیاند، "دوای هەوڵە فراوانەکانی سێ ساڵی رابردوو کە بوونە هۆی کارپێکردنی پاڵاوگە نوێیەکانی نەوت لە چوارچێوەی پلانی بەدیهێنانی خۆبژێوی، هەروەها گەیشتنی بەرهەمی ناوخۆیی (بەنزین، گازوایل و نەوت) بە بڕێک کە لە رێژەی بەکاربردنی ناوخۆیی زیاترە، سەرۆکوەزیران بڕیاری راگرتنی هاوردەکردنی ئەو بەرهەمانەی دەرکرد."
نووسینگەی سوودانی داوای لە بریکارەکانی دابەشکردن و کۆمپانیای دابەشکردنی بەرهەمە نەوتییەکان کردووە، کە بەکاربردنی نێوخۆیی کۆنتڕۆڵ بکەن و زیادەکەش بۆ هەناردەکردن تەرخان بکەن.
نووسینگەی سەرۆکوەزیرانی عێراق ئەو داواکارییەی بە نووسراوێک ئاراستەی وەزارەتی نەوت کردووە.
25ی مانگی رابردوو، عەبدولساحب بزوون، گوتەبێژی وەزارەتی نەوتی عێراق بە رووداوی گوت، "هاوردەکردنی بەنزین رادەگیرێ و خۆمان بەنزینی ئۆکتان بەرز و نۆرماڵ بەرهەم دەهێنین."
گوتەبێژی وەزارەتی نەوتی عێراق ئاماژەی بەوەشکرد، گەیشتن بەم قۆناخە وا دەکات "بەنزینیش هەناردە بکەین."
بە گوتەی عەبدولساحب بزوون، پاڵاوگەکانی بەسرە لەو پاڵاوگانەن کە بەرهەمهێنان تێیاندا زۆر بەرزبووەتەوە.
نەوتی عێراق 70%ی لە پارێزگای بەسرەیە و بەرهەمهێنانی رۆژانەی دەگاتە نزیکەی 3.25 ملیۆن بەرمیل.
